Prezıdent: depýtattar korpýsy óz qyzmetinde buryn-sońdy bolmaǵan nátıje kórsetti
ASTANA. KAZINFORM — Memleket basshysy Qasym-Jomart Toqaev Parlament palatalarynyń birlesken otyrysynda Senat jáne Májilis depýtattarynyń konstıtýtsııalyq reformalardy iske asyrýǵa qosqan zor úlesi jóninde málimdeme jasady.
— Osy shaqyrylymdaǵy Parlament depýtattary zań shyǵarý isinde sapaly jumys atqarýymen este qalady. Depýtattar korpýsy óz qyzmetinde buryn-sońdy bolmaǵan nátıje kórsetti.
Sizder Ádiletti Qazaqstannyń negizin qalaý úderisine, sondaı-aq Konstıtýtsııany ázirlep, qabyldaýǵa zor úles qostyńyzdar.
Kez kelgen depýtat saıasatkerler men qoǵam qaıratkerleriniń kelesi býynyna, balalary men nemerelerine: «Men 2026 jyly qabyldanǵan Konstıtýtsııany daıyndaýǵa tikeleı qatysqanmyn» dep esh uıalmaı aıta alady, — dedi Prezıdent.
Onyń málimdeýinshe, depýtattyq korpýs parlamenttik reformany tolyq qoldady. Sol arqyly saıası jáne azamattyq jaýapkershilik tanytyp, ult múddesi bárinen bıik turatynyn búkil álemge pash etti.
— Osynda otyrǵan biraz depýtat Konstıtýtsııalyq komıssııa quramynda boldy. Sizder azamattarmen kezdesip, memleketimizdiń turpatyn ózgertetin, ekonomıkalyq áleýetin kúsheıtetin reformalardyń mán-mańyzyn jurtshylyqqa jan-jaqty túsindirip berdińizder.
Sizder jalpyhalyqtyq referendýmda Ata zańymyz qabyldanǵan soń memleketimizdiń quqyqtyq júıesin jedel ári sapaly jańartý jumysyn júrgizdińizder.
Óte qysqa merzimde elimizdiń zańnamasyn jańa Konstıtýtsııa normalaryna saı ózgertý jumysyn atqardyńyzdar. Atap aıtqanda, Parlament 9 zań toptamasyn, sonyń ishinde 6 konstıtýtsııalyq zańdy shuǵyl ázirlep, qabyldady, — dedi Memleket basshysy.
Aıta keteıik, buǵan deıin Prezıdent Quryltaı quramyna tek úzdikter ǵana kirýi kerek ekenin málimdegenin jazǵanbyz.
