Prezıdent: Depýtattar halyq múddesin is júzinde qorǵap, árdaıym tabandylyq tanytýǵa tıis

NUR-SULTAN. QazAqparat - Bolashaqta partııa músheleriniń tizimin jáne soǵan qatysty basqa da rásimderdi onlaın formatta jasaýǵa bolady. Bul týraly 7-shi shaqyrylǵan Parlamenttiń 1-shi sessııasyn ashqan QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Bolashaqta partııa músheleriniń tizimin jáne soǵan qatysty basqa da rásimderdi onlaın formatta jasaýǵa bolady. Osy maqsatta elektrondy úkimettiń múmkindikterin paıdalanǵan abzal. Parlamenttiń zań shyǵarýmen qatar baqylaý fýnktsııasy da bar ekenin bilesizder. Onyń tıimdiligi halyqaralyq tájirıbede dáleldengen», - dedi Memleket basshysy.

QR Prezıdentiniń paıymynsha, osy asa mańyzdy quzyretti tıimdi paıdalaný qazirgi zamanǵy Qazaqstan parlamentarızminiń ınstıtýtsıonaldyq negizin edáýir ornyqtyrady.

«Bul meniń «kúshti Prezıdent, yqpaldy Parlament, jaýapty Úkimet» dep atalatyn saıası formýlammen úndesip jatyr. Depýtattar halyqtyń múddesin is júzinde qorǵap, árdaıym tabandylyq tanytýǵa tıis», - dedi Qasym-Jomart Toqaev.