Prezıdent densaýlyq saqtaý salasyndaǵy júıeli qatelikterdi ashyq aıtty – sarapshy

NUR-SULTAN. QazAqparat – Eýrazııalyq ıntegratsııa ınstıtýtynyń sarapshysy Baýyrjan Serikbaev Memleket basshysy Qasym-Jomart Toqaevtyń elimizde qalyptasqan ahýalǵa baılanysty úndeýine qatysty pikir bildirdi, dep habarlaıdy QazAqparat tilshisi.

«Baıqasańyzdar, Prezıdent máselege kelgende problemany ashyq moıyndaıdy. Burynǵydaı «Bizde bári jaqsy» degen belden basý joq. Esterińizde bolsa saılaýdan keıin Qazaqstan halqynyń kedeılenip ketkenin ashyq aıtty. Artynsha nesıeni de keshirdi. Tabysy kópter kóp salyq tólesin, kirisi azdar az tóleýi qajet dep áleýmettik ádilettilik týraly da oń bastamalardyń bastaýynda júr», - dep jazady Baýyrjan Serikbaev Facebook paraqshasynda.

Onyń jazýynsha, eń bastysy Memleket basshysy búgin halqy qınalyp jatqanda kóńilge demeý berip, densaýlyq saqtaý salasynda júıeli qatelikter bolǵanyn da ashyq aıtqan. Buǵan qatysty barlyq sala jumystaryna tekserý júrgizetinin, ákimderdiń jumysyna kóńili tolmaıtynyn da bildirgen.

«Prezıdent qadamdarynan jaǵdaıdy baqylap otyrǵany, ózgeriske degen qulshynysy baıqalady. Tájirıbeli saıasatkerlerge tán sabyrlyq pen aqyryndap alǵa jyljý bar. Prezıdent osylaı jıi shyǵyp, tosynnan kelgen indetten abdyrap qalǵan halyqqa demeý bolsa deımiz», - deıdi Baýyrjan Serikbaev.

Eske sala ketsek, búgin Memleket basshysy Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeý jarııalaǵan bolatyn.