Prezıdent Densaýlyq saqtaý mınıstrine mindetti medıtsınalyq saqtandyrý júıesin tıimdi etýdi tapsyrdy
ASTANA. KAZINFORM - Prezıdent Densaýlyq saqtaý mınıstri Aqmaral Álnazarovany qabyldady, dep habarlaıdy Aqorda.
Memleket basshysyna densaýlyq saqtaý júıesiniń qazirgi jaı-kúıi men aldaǵy kezeńge arnalǵan perspektıvti mindetteri jóninde baıandaldy.
Aqmaral Álnazarova ótken jyly elimizde ómir súrý uzaqtyǵy 75,4 jasqa jetkenin aıtty. Bul – álemdik ortasha deńgeıden joǵary kórsetkish. Bıylǵy birinshi jartyjyldyqta jalpy ólim-jitim 3 paıyzǵa tómendedi. Byltyr alǵash ret ana men bala ólimi eń az kólemde tirkeldi.
Alǵashqy medıtsınalyq-sanıtarlyq kómektiń tıimdiligin arttyrý, «Qoljetimdi emhana» tujyrymdamasyn júzege asyrý, halyqtyń skrınıngten ótýin jeńildetý boıynsha málimet berdi.
Sonymen qatar dári-dármekpen tolyq qamtamasyz etý jáne onyń aınalymyn baqylaýdy kúsheıtý sharalary júrgizilip jatyr.
2024 jylmen salystyrǵanda dárigerler tapshylyǵy respýblıkada – 19 paıyzǵa, aýyldarda – 16 paıyzǵa jáne orta býyn medıtsına qyzmetkerleriniń jetispeýshiligi 7 paıyzǵa azaıdy.
Mınıstr medıtsına qyzmetkerlerin qorǵaý sharalary jóninde de aqparat berdi. Bul oraıda zańnamany qatańdatýǵa, dárigerlerge shabýyl jasalǵan jaǵdaıda jedel kómek kórsetýge den qoıylady.
Vedomstvonyń málimetinshe, kelesi jyldan bastap áleýmettik osal toptaǵy 1 mıllıon adam medıtsınalyq saqtandyrýmen qamtylady.
Memleket basshysy «Aýylda densaýlyq saqtaýdy jańǵyrtý» ulttyq jobasy aıasynda eldi mekenderdegi alǵashqy medıtsınalyq-sanıtarlyq kómek kórsetý nysandarynyń qurylysyn jyl sońyna deıin aıaqtaý, mindetti medıtsınalyq saqtandyrý júıesin tıimdi etý, asa mańyzdy dári-dármekterdiń otandyq óndirisin damytý boıynsha birqatar mindet júktedi.
Sondaı-aq azamattardyń densaýlyǵyn nyǵaıtý jáne medıtsınalyq kómektiń sapasy men qoljetimdiligin arttyrý jumystaryn jalǵastyrý jóninde tapsyrma berdi.
Aıta keteıik, Memleket basshysy Japonııanyń Syrtqy ister mınıstrin qabyldady.