Prezıdent Densaýlyq saqtaý mınıstri Aqmaral Álnazarovany qabyldady
ASTANA. KAZINFORM — Memleket basshysy Densaýlyq saqtaý mınıstri Aqmaral Álnazarovany qabyldady. Bul týraly Aqordanyń baspasóz qyzmeti habarlady.
Aqmaral Álnazarova vedomstvonyń jumysy jáne densaýlyq saqtaý júıesin damytý josparlary týraly baıandady. Qazirgi ýaqytta boljamdy ómir súrý uzaqtyǵynyń kórsetkishi 75 jastan asatyny jóninde aıtty. Jyl basynan beri ınfektsııalyq aýrýlardyń 21 túri boıynsha, sonyń ishinde koronavırýspen syrqattaný kórsetkishteri tómendegen. Vaktsınatsııalaý jáne profılaktıkalyq is-sharalardy júrgizý jumystary jalǵasyp jatyr.
Medıtsınalyq qyzmettiń sapasyn jáne qoljetimdiligin arttyrýǵa basa nazar aýdarylǵany týraly esep berdi. Alǵashqy jáne statsıonarlyq medıtsınalyq kómekti uıymdastyrýdyń tásilderi qaıta qaralyp jatyr. Sondaı-aq dıagnostıkalyq jáne emdeý standarttary jańartylyp, salanyń kadrlyq áleýeti nyǵaıyp keledi.
Dári-dármek pen medıtsınalyq buıymdardy satyp alý júıesiniń tıimdiligi men ashyqtyǵy qamtamasyz etilip jatqany týraly aıtty. Budan bólek, medıtsınalyq mekemeler jumysynyń tıimdiligin arttyryp, mindetti áleýmettik medıtsınalyq saqtandyrýǵa baqylaýdy jaqsartý úshin zamanaýı tsıfrlyq tehnologııalar ázirlengen. Olar qoldanysqa engizilip jatyr.
Jańa medıtsınalyq nysandar salý jáne sala qyzmetteriniń sapasyn odan ári arttyrý máseleleri qamtylǵan Densaýlyq saqtaý ınfraqurylymyn damytýdyń 2025-2030 jyldarǵa arnalǵan strategııalyq jospary týraly aqparat berdi. Qabyldanǵan osy tujyrymdama aıasynda densaýlyq saqtaý uıymdarynyń ońtaıly jáne tıimdi jelisin qurýǵa baǵyttalǵan 34 negizgi jobany iske asyrý josparlanyp otyr.
Kezdesý sońynda Memleket basshysy ana men bala óliminiń kórsetkishterin tómendetý boıynsha jumysty jalǵastyrý qajet ekenin atap ótti. Sonymen qatar medıtsınalyq kómek kórsetýdiń meılinshe nátıjeli bolýyna nazar aýdara otyryp, densaýlyq saqtaý júıesin sapaly túrde qaıta qurý kerektigine toqtaldy. Sondaı-aq salaǵa, onyń ishinde dári-dármekke bólinetin qarajattyń ashyqtyǵy men tıimdiligin qamtamasyz etý jóninde mindetter júktedi.
