Prezıdent dárigerdiń xatyn oqyp berdi
«Men - dárigermin. 25 jyldan beri medıtsına salasynda qyzmet isteımin. 90-jyldardaǵy qıyn sátter áli kúnge deıin kóz aldymda. Muqtaj jandarǵa der ýaqytynda kómek kórsetý bizdiń armanymyz edi. Bizdiń sol armanymyzdy Siz oryndadyńyz. 2011 jyldan beri sanıtarlyq avıatsııamen 6 myń 700 ret saparǵa shyǵyp, 8,5 myń adamǵa jedel kómek kórsettik. Sonyń arqasynda ómirge qaıta oralǵan jandardyń Sizge aıtqan alǵys-batalaryn tebirenbeı tyńdaý múmkin emes»,- dep jazdy dáriger.
Osy oraıda Prezıdent otandyq medıtsınanyń burynǵy jáne qazirgi deńgeıiniń aıyrmashylyǵy jer men kókteı ekenin jetkizdi. Prezıdenttiń aıtýynsha, búginde jyljymaly emdeý keshenderi shalǵaı jerdegi azamattarǵa kómek kórsetip júr. Sońǵy bes jyldyń ishinde 3 mln adamǵa medıtsınalyq kómek jasaldy.
«Solardy tyńdap otyrsań, Qazaqstannyń eń túkpirdegi jerlerge baryp, dárigerdiń aldyn kórmegen adamdardy da kezdestirgen. Oǵan arnaýly poezdardy qosyńyz. Osynyń arqasynda eń alys aýyldardyń turǵyndary astanalyq deńgeıde sapaly kómek aldy. Elimizde sábılerdiń dúnıege kelýi 55 paıyzǵa ósti. Azamattardyń ortasha ómir súrý uzaqtyǵy 72 jasqa jetti. Menińshe, eń negizgi jetistigimiz osy», - dep atap kórsetti Memleket basshysy.