Prezıdent dári-dármek boıynsha turaqtandyrý qorlaryn normatıvke sáıkes jasaqtaýdy tapsyrdy
NUR-SULTAN. QazAqparat – Memleket basshysy Qasym-Jomart Toqaev aldaǵy eki aptada Úkimet múshelerine dári-dármek boıynsha turaqtandyrý qorlaryn belgilengen normatıvke sáıkes jasaqtaýdy tapsyrdy, dep habarlaıdy QazAqparat tilshisi.
«Ekinshi másele. Biz jaz aılarynda dári-dármek tapshylyǵyn aıqyn sezindik. Meniń tapsyrmam boıynsha naqty jumys atqaryldy. Atap aıtqanda, eki aıǵa jetetin qor jasaqtalyp, eń qajetti degen dári-dármektiń tizimi ulǵaıtyldy. Ony syrttan ákelý jáne tirkeý tártibi jeńildetildi. Biraq, óńirlerde dári-dármekterdi turaqtandyrý qorlarynyń kólemi jáne daıyndyq jumystary birkelki emes. Mysaly, Batys Qazaqstan jáne Aqtóbe oblystarynda – eki júz mıllıon teńgeden. Mańǵystaý oblysynda – úsh júz mıllıon teńge. Al, Nur-Sultan qalasynda bir mıllıard alty júz mıllıon teńge, Almatyda – bes mıllıard teńge», - dedi Prezıdent koronavırýs indetiniń ekinshi kezeńine daıyndyq máseleleri boıynsha keńeste sóılegen sózinde.
Memleket basshysy Densaýlyq saqtaý mınıstrliginiń óńirlerdegi daıyndyq barysyna bergen baǵasymen tanysqanyn jetkizdi. Soǵan sáıkes, Mańǵystaý jáne Almaty oblystarynda emhanalar men aýrýhanalardyń daıyndyǵy nashar ekendigi anyqtalyp otyr. Osy olqylyqtardy Úkimet pen ákimder dereý túzetýge mindetti.
«Úkimetke ákimdermen birlesip, eki apta ishinde turaqtandyrý qorlaryn belgilengen normatıvke sáıkes jasaqtaýdy jáne medıtsına ınfraqurylymynyń tolyq daıyn bolýyn qamtamasyz etýdi tapsyramyn», - dedi ol.
