Prezıdent Chehııa Premer-mınıstrin І dárejeli «Dostyq» ordenimen marapattady
ASTANA. KAZINFORM – Qasym-Jomart Toqaev Andreı Babıshke bul memlekettik nagrada Chehııa men Qazaqstan arasyndaǵy strategııalyq seriktestikti nyǵaıtýǵa qosqan eleýli úlesi úshin tabystalǵanyn aıtty. Bul týraly Aqordanyń baspasóz qyzmeti habarlady.
– Siz Qazaqstannyń senimdi dosy ári halyqaralyq deńgeıdegi kórnekti memleket qaıratkerisiz. Ekijaqty qarym-qatynasty tabysty damytýǵa baǵyttalǵan syndarly ustanymyńyzdy joǵary baǵalaımyn. Siz ózara yqpaldastyqty ilgeriletý jolynda aıanbaı eńbek etip kelesiz, sol sebepti baılanystarymyzdyń keleshegine senimmen qaraımyz. Elderimiz arasyndaǵy saıası, saýda-ekonomıkalyq jáne mádenı-gýmanıtarlyq yntymaqtastyqty damytýǵa zor úles qosqanyńyz úshin Sizge І dárejeli «Dostyq» ordenin tabystaý týraly sheshim qabyldadym. Bul joǵary marapat qazaq-cheh berik dostyǵynyń jarqyn sımvolyna aınalady. Seriktestigimiz bolashaqta da jandanyp, nyǵaıa beretinine senimdimin, - dedi Prezıdent.
Andreı Babısh joǵary memlekettik nagradamen marapattaǵany úshin Qasym-Jomart Toqaevqa rızashylyǵyn bildirdi.
– Eki el arasyndaǵy yntymaqtastyqtyń nátıjeli damyp kele jatqanyna shynaıy qýanyshtymyn. Saıası dıalogymyz ashyq ári syndary sıpatqa ıe. Halyqaralyq arenadaǵy yqpaldastyǵymyz turaqtylyqqa, beıbitshilik pen seriktestikke beıil ekenimizdi kórsetedi. Cheh Respýblıkasy Qazaqstannyń álemdik arenadaǵy senimdi áriptesi ekenin maqtan tutady. Prezıdent myrza, osy joǵary marapatqa laıyq kórgenińiz jáne halyqaralyq seriktestik pen dıalogty nyǵaıtýǵa zor úles qosqanyńyz úshin alǵys aıtamyn. Aldaǵy ýaqytta da halyqtarymyz arasyndaǵy dostyqty tereńdetý, álemde turaqtylyq ornatý jolynda qyzmet ete beremiz dep senemin, - dedi Chehııa Premer-mınıstri.
Eske sala keteıik, buǵan deıin Qasym-Jomart Toqaev pen Andreı Babısh shaǵyn quramda kelissóz júrgizgenin jazǵan edik.
