Prezıdent: BJZQ-dan «uzaq merzimge beriletin» qarjyny belsendi tartýǵa bolady

ASTANA. KAZINFORM — Memleket basshysy Qasym-Jomart Toqaev Úkimettiń keńeıtilgen otyrysynda naqty sektordy kredıtteýdiń máselelerine toqtaldy.

— Bıznestiń kepilge qoıatyn múlkiniń bolmaýy naqty sektordy kredıtteýge kedergi keltiredi. Sondyqtan zaımdy kepildendirý quraldaryn kóbeıtý qajet. Úkimet salalyq damý ınstıtýttarymen birlesip, kepildik qoryn qurý máselesin pysyqtaýy kerek, — dedi Prezıdent.

Memleket basshysy BJZQ qarjysyn strategııalyq jobalarǵa tartý týraly da pikir bildirdi.

— Bankterdiń, korporatsııalardyń, ortalyq jáne jergilikti bılik organdarynyń jyl saıynǵy jarnasy esebinen qarjylandyrylatyn mundaı qorlar birqatar elde óz tıimdiligin kórsetti. Sondaı-aq ekonomıkalyq qaıtarymy joǵary strategııalyq jobalardy júzege asyrǵan kezde Biryńǵaı zeınetaqy jınaqtaýshy qorynan naryq sharttaryna saı «uzaq merzimge beriletin» qarjyny anaǵurlym belsendi tartýǵa bolady, — dedi Memleket basshysy.

Aıta keteıik, elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. 

Іs-sharany ashqan Prezıdent Úkimet pen ákimder jumysynyń tıimdiligi azamattardyń turmys sapasyna qaraı baǵalanatyn aıtty. 

Sondaı-aq Prezıdent Qasym-Jomart Toqaev Úkimettiń keńeıtilgen otyrysynda Ekinshi deńgeıdegi bankterdiń resýrstaryn úkimettik baǵdarlamalarǵa tartý týraly pikir bildirdi.