Prezıdent: Bizge ǵalymdar, ınjenerler, ónertapqyshtar qajet

ALMATY. KAZINFORM – Memleket basshysy Qasym-Jomart Toqaev Almatyda ǵalymdarmen kezdesti. Kezdesý barysynda mamandarymyz álemdik básekege tótep bere alatyndaı bilimdi, bilikti bolýy kerek ekenin aıtty. Bul týraly Aqordanyń baspasóz qyzmeti habarlady.

Qasym-Jomart Toqaevtyń aıtýynsha, shıkizatqa arqa súıep otyrǵan el alysqa barmaıdy. Bizge ǵalymdar, ınjenerler, ónertapqyshtar qajet. Mamandarymyz álemdik básekege tótep bere alatyndaı bilimdi, bilikti bolýy kerek. Búginde alpaýyt elderdiń arasynda barlyq salada baqtalastyq órship tur. Biz osy kúrdeli kezeńde ekonomıkanyń jańa úlgisine kóshe bastadyq. Ádil, ınklıýzıvti ári básekege qabiletti ekonomıka qurýǵa kiristik. Ǵylym men ınnovatsııa onyń basty tiregi bolýǵa tıis.

«Biz kóshke ilesetin emes, kóshti bastaıtyn elderdiń qatarynda bolýymyz kerek. Bir sózben, ǵylymı áleýetimizdi arttyrý qajet. Jalpy, osy baǵytta biraz sharýa atqarylyp jatyr. Men Ǵylym jáne tehnologııalar jónindegi ulttyq keńestiń otyrysynda birqatar naqty tapsyrma berdim. Barlyq másele meniń tikeleı baqylaýymda. Qazir «Ǵylym jáne tehnologııalyq saıasat týraly» zań jobasy Parlamentte qaralyp jatyr. Keshe Senat ony birinshi oqylymda maquldady. Bul – óte mańyzdy ári kópten kútken qujat. Ǵylymdy basqarý júıesin jetildirý kerek. Ǵalymdarǵa áleýmettik qoldaý kórsetý máselesi de óte mańyzdy. Sondyqtan Zańda ǵylymı qaýymdastyqtyń múddesi barynsha eskeriletin bolady», - dedi Prezıdent.

Memleket basshysy Qasym-Jomart Toqaev ǵalymdarmen kezdeskenin jazǵan bolatynbyz.