Prezıdent: Bizdiń strategııalyq maqsatymyz – agroónerkásip keshenin joǵary tehnologııalyq salaǵa aınaldyrý

ASTANA. KAZINFORM – Qazaqstan Prezıdenti ónerkásip salasyndaǵy kooperatsııany tereńdetýdi kelesi basym mindet retinde atap ótti. 

Memleket basshysynyń aıtýynsha, búginde «Eýrazııalyq bestikke» kiretin elder eksportynyń 90 paıyzǵa jýyǵy aralyq taýarlardan quralǵan. 

– Jahandyq tehnologııalyq progress jaǵdaıynda óndiriletin ónimniń «kúrdeliligine» mán berý – óte ózekti másele. Sondyqtan ekonomıkanyń naqty sektoryndaǵy tehnologııalyq ıntegratsııany kúsheıtý qajet. Ózderińizge málim, bıyldan bastap Eýrazııalyq ekonomıkalyq odaq bıýdjetiniń qarajaty esebinen ónerkásip salasyndaǵy kooperatsııalyq jobalarǵa qarjylaı qoldaý kórsetiledi. Joǵary deńgeıde óńdelgen taýar óndirisin jolǵa qoıyp jatqan ozyq tehnologııalyq kásiporyndarǵa qoldaý kórsetý kerek. Árıne, qarjylandyrý kózderine birdeı qoljetimdilikti qamtamasyz etýdiń ashyq mehanızmin qalyptastyrý – mańyzdy mindet. Qazaqstan óz tarapynan Eýrazııa keńistigindegi ónerkásip kooperatsııasyn damytýǵa baǵyttalǵan dáıekti saıasatyn júrgize beredi. Qazirgi tańda Odaqqa múshe elder 150-den astam ındýstrıaldyq jobany júzege asyryp jatyr, – dedi Qasym-Jomart Toqaev. 

Memleket basshysy munaı-gaz hımııasy salasyndaǵy yntymaqtastyqtyń perspektıvasy zor ekenine toqtaldy. Bul sala ekonomıkalyq ósimge tyń serpin bere alady. 

– Reseılik seriktesterdiń qatysýymen polıpropılen, polıetılen jáne býtadıen shyǵaratyn joǵary tehnologııalyq zaýyttar salyp jatyrmyz. Bastapqy shıkizattyń baǵasynan 20 ese asyp túsetin, úshinshi deńgeıde óńdeletin ónim shyǵarý jolǵa qoıylady, – dedi Qazaqstan Prezıdenti. 

Memleket basshysy azyq-túlik qaýipsizdigin nyǵaıtýdy yntymaqtastyqtyń taǵy bir mańyzdy baǵyty dep sanaıdy. 

– Eýrazııa qurlyǵy álemdegi óndiristik-resýrstyq jáne eksporttyq áleýeti óte myqty aımaqtardyń biri ekeni barshaǵa málim. Álemde halyq sany ósip, basqa makroóńirlerde resýrstar shekteýli bolǵan jaǵdaıda 600 mıllıonǵa jýyq adamdy azyq-túlikpen qamtamasyz etýge múmkindigimiz bar. Bul rette Odaqtyń jahandyq azyq-túlik qaýipsizdigin qamtamasyz etý isindegi róli tek kúsheıe túsedi. Bizdiń strategııalyq maqsatymyz – agroónerkásip keshenin joǵary tehnologııalyq salaǵa aınaldyrý. Ol úshin jasandy ıntellekt, robotty tehnıka, bıotehnologııa jáne agrarlyq ǵylym salalaryna negizdelgen serpindi ınnovatsııalyq tehnologııalardy engizý jóninde kelisilgen sharalar qabyldaý óte mańyzdy, – dedi Qazaqstan Prezıdenti. 

Qasym-Jomart Toqaevtyń aıtýynsha, búginde tabysty tsıfrlyq transformatsııa tek jekelegen elderdiń ǵana emes, búkil óńirdiń ekonomıkalyq damýy men tehnologııalyq derbestigin aıqyndaıtyn faktorǵa aınalyp otyr. 

– Bizge jahandyq deńgeıdegi «tsıfrlyq báıgede» laıyqty oryn alyp, aldyńǵy qatarda bolý mańyzdy. Tsıfrlandyrý salasyndaǵy yntymaqtastyq ıntegratsııalyq birlestikti ornyqty damytýdyń qozǵaýshy kúshi bolýǵa tıis. Sondyqtan Qazaqstan jappaı tsıfrlandyrý jaǵdaıynda Odaqtyń «tórt erkindik» qaǵıdatyn damytý jónindegi Eýrazııalyq ekonomıkalyq komıssııanyń bastamasyn qoldaıdy. Osy rette biz jasandy ıntellektige basa mán bere otyryp, aımaqta barynsha jyldam damyp kele jatqan tsıfrlyq ekonomıkalardyń birin quramyz, – dedi Memleket basshysy. 

Qazaqstan Prezıdenti sóziniń sońynda EAEO qurylǵannan beri 10 jyl ishinde Odaqqa múshe memleketter barlyq baǵyt boıynsha tańqalarlyq nátıjege qol jetkizgenin atap ótti. Sondaı-aq uıymnyń áleýeti zor ekenin eskere otyryp, áli de kóp jumys isteý qajettigine nazar aýdardy. Onyń pikirinshe, Qazaqstan teń quqyqtyq jáne ózara tıimdi seriktestik qaǵıdattaryna negizdelgen ekonomıkalyq ıntegratsııany qoldaıdy.

Qasym-Jomart Toqaev múmkindikti paıdalana otyryp, jıynǵa qatysýshylardy kele jatqan Uly Jeńis kúnimen quttyqtady. 

Jıyn qorytyndysy boıynsha birqatar qujat qabyldandy.