Prezıdent: Bizdiń etnıkalyq áralýandylyǵymyz — strategııalyq artyqshylyǵymyz

ASTANA. KAZINFORM — Almaǵaıyp zamanda strategııalyq baǵdarǵa saı áreket etý — Qazaqstan halqynyń aldynda turǵan asa mańyzdy mindet. Prezıdent Qasym-Jomart Toqaev Qazaqstan halqy Assambleıasynyń HHHІV sessııasynda osyndaı paıym aıtty.

— Keıbir memleket úshin etnıkalyq áralýandylyq syn-qaterdiń, senimsizdik pen tózbeýshiliktiń belgisi bolýy múmkin. Biraq bul bizdiń jalpyulttyq qazynamyz ári strategııalyq artyqshylyǵymyz. Yntymaq-birlik, dıalog, ózara senim men qurmet, azamattyq jaýapkershilik — munyń bári elimizdi qarqyndy damytýdyń myzǵymas qaǵıdattary. Osy qundylyqtarǵa arqa súıeı otyryp, biz Táýelsizdiktiń zor jetistikterin saqtap, eselep, keler urpaqqa amanattaı alamyz. Sonda ǵana Ádiletti Qazaqstandy quramyz, — dedi Qasym-Jomart Toqaev.

Memleket basshysy Qazaqstan halqy óz jerinde tynyshtyq pen kelisimde ómir súrýge bolatynyn dáleldegen birtutas ult ekenin atap ótti. 

— Osynaý tar jol, taıǵaq keshýde elimizdiń táýelsizdigi men derbestigin nyǵaıtyp, barlyq qıyndyqty eńserip, maqsatymyzdan aınymaımyz, — dedi Toqaev.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr. Keńeıtilgen otyrystyń kún tártibi — «Qazaqstan halqy Assambleıasynyń 30 jyldyǵy: qorytyndylar jáne bolashaq mindetter».

Osyǵan deıin Prezıdent ártúrli el men mádenıet ókilderiniń arasyndaǵy dostyq baılanys qaqtyǵystar men soǵystardyń aldyn alatynyn aıtty.

Sonymen qatar, Memleket basshysy demokratııany bireýdiń qarjysymen ornatýǵa bolmaıtynyn atap ótti.