Prezıdent: Biz ulttyq bolmysymyzdy bekemdep, yntymaq-birligimizdi nyǵaıta beremiz

ASTANA. KAZINFORM – Saıası qýǵyn-súrgin jáne asharshylyq qurbandaryn eske alýǵa arnalǵan is-sharada Ádiletti Qazaqstandy qurý úshin aýqymdy reformalar jasalyp jatqanyn aıtty. 

— Biz strategııalyq baǵdarymyzdy berik ustanyp kelemiz. Ádiletti Qazaqstandy qurý úshin aýqymdy reformalar jasap jatyrmyz. Úsh jyl buryn jalpyulttyq referendým ótkizip, Ata Zańymyzǵa ózgerister engizdik. Sol arqyly elimizdiń turaqty damýyna myzǵymas negiz qaladyq. Memlekettiń saıası júıesin túbegeıli jańǵyrtyp, Parlamenttiń quzyretin keńeıttik, Úkimettiń jaýapkershiligin kúsheıttik. Konstıtýtsııalyq Sot quryldy. Azamattardyń memlekettik mańyzy bar sheshim qabyldaýǵa qatysý múmkindigi edáýir artty. Aýyl jáne aýdan ákimderi tikeleı saılanatyn boldy. Bul qadam qoǵamnyń bılikke degen senimin nyǵaıta tústi.

Zań men tártip ústemdigin ornyqtyrý, áıelderdiń quqyǵy men balalardyń qaýipsizdigin qamtamasyz etý úshin júıeli reformalar júzege asyryldy. Osy baǵytta Parlament tıisti zańdar qabyldady. Bul — elimizdi jan-jaqty jańǵyrtýdy kózdeıtin aýqymdy jumystyń bir bóligi ǵana. Aldymyzda qyrýar sharýa kútip tur. Shyn máninde reformalardyń nátıjesine ultymyzdyń sana sezimi, tipti bolmysy ózgere bastady, — dedi ol.

Prezıdent elde jańa saıası jáne saılaý mádenıeti ornyǵyp keletinin aıtty.

— «Taza Qazaqstan» jalpyulttyq jobasy — sonyń aıqyn dáleli, halyq bul uzaqmerzimdi strategııany jappaı qoldady. Biz qazir bir el bolyp Ádiletti memleket pen berekeli qoǵam quryp jatyrmyz. Osy ortaq iske azamattarymyz belsene qatysýda. Halqymyzdyń reformalarǵa degen senimi zor. Sebebi jurtymyz — jasampaz ári jańashyl.

Elimizde jańa saıası jáne saılaý mádenıeti ornyǵyp keledi. Qoǵamda ár alýan pikir bolsa da, tutas eldiń maqsat-muraty — bir. Jurtshylyq masyl bolý, orynsyz syn aıtyp, min taǵý sekildi teris qasıetterden jırene bastady. Biz eńbekqor, bilimpaz jáne ozyq ult bolýǵa umtylǵan elmiz. «Zań jáne tártip» memleketimizdiń basty baǵdaryna aınalýda. Elimizde sanaly, sapaly qoǵam qalyptasýda. Júrgizilip jatqan reformalardyń maqsaty da — osy. Bul tarıhı maǵynasy bar jumys toqtamaıdy, jalǵasa beredi. Biz ulttyq bolmysymyzdy bekemdep, yntymaq-birligimizdi nyǵaıta beremiz, — dedi ol. 

Memleket basshysy eń aldymen jastarymyz bulyńǵyr keleshekke tolyq daıyn bolýǵa tıis ekenin atap ótti.

— Búgingi jıynǵa jastar da qatysyp otyr. Sizderge aıtarym: tól tarıhymyzdy tereń bilý qajet. Biraq bul tek ótken kúnmen ómir súrý degen sóz emes. Árbir jas keleshekke aıqyn kózqaraspen qarap, nyq qadam basýy kerek.

Qazirgi zaman óte kúrdeli, buryn bolmaǵan úrdister paıda bolyp jatyr. Jasandy ıntellektiniń búkil qoǵamdyq damýǵa qandaı yqpaly bolmaq ekeni áli tolyǵymen zerttelmegen. Adamzatqa tónetin qaýip-qaterler az bolmaıdy. Sondyqtan eń aldymen jastarymyz bulyńǵyr keleshekke tolyq daıyn bolýǵa tıis. Bul maqsatqa jetý úshin óskeleń urpaqtyń kózi ashyq, kókiregi oıaý, uqypty, tártipti, jınaqy bolýy kerek. Abaısha aıtqanda, «ǵylym tappaı maqtanbaýy» qajet. Egemen el bolýdyń qadir-qasıetin túsinip, táýelsizdigimizdi qorǵaýǵa qashanda daıyn bolýy kerek. Sonda bizdiń memlekettiligimiz — myǵym, bolashaǵymyz — baıandy bolary haq. Men otanshyl ul-qyzdarymyzdyń jasampaz kúsh-jigerine senemin. Joldaryńyz árdaıym ashyq bolsyn! Elimiz aman, jurtymyz tynysh bolsyn, — dedi Qasym-Jomart Toqaev. 

Aıta ketelik Prezıdent «ALJIR» saıası qýǵyn-súrgin jáne totalıtarızm qurbandarynyń memorıaldy-murajaı keshenine barǵan edi.