Prezıdent: Biz bárimiz bir ult bolyp tarıhı joldyń torabyna jettik
ASTANA.KAZINFORM – Prezıdent Qýatty jáne turaqty ekonomıkasy bar Ádiletti, básekege qabiletti Qazaqstandy qurýǵa jeteleıtin ornyqty damýdyń ınstıtýttyq jáne quqyqtyq negizderi Konstıtýtsııa jobasynda kórinis tapqanyn atap ótti. Bul týraly Aqordanyń baspasóz qyzmeti habarlady.
Qazirgi Ata Zańymyz qabyldanǵan shaqta Qazaqstan eńsesin endi tiktep jatqan edi. Ol kezde Egemendikti saqtap qalý, bılik ınstıtýttaryn qurý, eldegi turaqtylyqty qamtamasyz etý mindetterine basymdyq berildi.
– Búgingi Konstıtýtsııa elimizdiń qol jetkizgen barlyq jetistiginiń bastaýynda turdy. Bul – Qazaqstan Respýblıkasynyń Tuńǵysh Prezıdenti Nursultan Nazarbaevtyń arqasy. Biraq zaman bir jerde turmaıtyny belgili. Qazir Qazaqstan – halyqaralyq bedeli bıik, saıası júıesi myǵym, ekonomıkasy ornyqty damyp jatqan qýatty memleket. Sheteldegi saıasatkerler men sarapshylar elimizdi iri orta memleket retinde moıyndap, qurmet bildirip jatyr.Biz BUU Jarǵysynyń negizine aınalǵan halyqaralyq quqyq saqtalýy qajet dep sanaımyz. Aldaǵy ýaqytta da osy qaǵıdattan aınymaımyz. Bul – Qazaqstannyń naqty ustanymy. Elimizdiń Konstıtýtsııasynda ulttyq zańnama talaptaryn eskermeı, ony ekinshi orynǵa qoıatyn ekiushty ereje bolmaýy kerek. Buǵan jol berýge bolmaıdy. Bul da Táýelsizdik pen Egemendik máselesi, - dedi Prezıdent.
Ata Zańymyzda Qazaqstan halqynyń birligin, etnosaralyq, konfessııaaralyq kelisimdi, toleranttylyqty nyǵaıtatyn normalar bar. Bul – bizdiń saıası, rýhanı qundylyqtarymyz. Sondyqtan ony quqyqtyq tetikter arqyly kúlli qoǵam bolyp qorǵaýǵa mindettimiz.
Qazaqstannyń ekonomıkasy Ortalyq Azııa men Kavkaz óńirindegi eń úlken ekonomıka sanalady. Qazaqstan dúnıe júzindegi eń iri 50 ekonomıkanyń qataryna qosyldy. Bul 20 mıllıon halqy bar el úshin jaqsy nátıje dep aıtýǵa bolady.
– Biz barlyq eldermen tyǵyz qarym-qatynasty damytyp, teńgerimdi, salıqaly, ult múddesine saı syrtqy saıasatty júrgize otyryp, óz jolymyzben júrip kelemiz. Al jańa Konstıtýtsııany qabyldaý, bul – ýaqyt talaby, memleketimizdiń aldynda turǵan ózekti, shuǵyl mindet. Bas qujattyń jobasy Qazaqstannyń tuǵyry berik, baǵdary aıqyn, alysqa kóz tigetin ozyq oıly el ekenin kórsetedi. Onyń ár normasy ult múddesine qyzmet etedi. Ata Zań jobasynda Ádildik pen Otanshyldyq, Zań men Tártip, Tazalyq pen Adaldyq qaǵıdattary aıqyn kórinis tapty. Biz bárimiz bir ult bolyp tarıhı joldyń torabyna jettik, endi halqymyz kele jatqan jalpyhalyqtyq referendýmda el taǵdyryna áser etetin tańdaýyn jasaıdy. Men jańa Konstıtýtsııanyń mán-mańyzyna jaqyn arada taǵy da keńirek toqtalamyn, - dedi Memleket basshysy.
Memleket basshysy túrli salada tabysty jumys istep, elimizdiń áleýetin arttyrýǵa atsalysyp júrgen áıelder týraly aıtty.
– Osy jerde Qazaqstannyń ár aımaǵynan kelgen kóptegen mamandyq ıeleri otyr. Sizder túrli salada tabysty jumys istep, elimizdiń áleýetin arttyrýǵa atsalysyp kelesizder. Ádiletti Qazaqstandy ózderińiz sııaqty jaýapkershiligi mol, jasampaz, kózi ashyq, tııanaqty, eńbekke adal azamattar quryp jatyr. Men muny úlken rızashylyqpen atap ótkim keledi. Bárińizdi zor qurmetke laıyq dep sanaımyn, - dedi Prezıdent.
Prezıdent Qasym-Jomart Toqaev Halyqaralyq áıelder kúnine arnalǵan saltanatty is-sharada sóılegen sózinde Qazaqstandaǵy áıelderdiń qoǵam men damýǵa qosqan úlesi týraly aıtty.
