Prezıdent bıýdjetti tıimdi ıgerý týrasynda: árkim óz bilgenin jasaǵandy qoıý kerek
ASTANA. KAZINFORM – Bıýdjet qarjysy azamattarymyzǵa naqty paıda ákeletin jáne ulttyq ekonomıkanyń damýyna septigin tıgizetin jobalarǵa berilýge tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.
- Fıskaldyq saıasattyń tıimdiligine, eń aldymen, bıýdjetti retke keltirip, qarjy tártibin qatań saqtaý arqyly qol jetkizýge bolady. Memlekettiń tıimsiz shyǵyndaryn qysqartý úshin qoldanystaǵy bıýdjet baǵdarlamalaryn bastan-aıaq qaıta qaraý qajet. Bul – óte mańyzdy mindet. Muny oryndaýdy sozbalańǵa salmańyzdar. Bul iste Qarjy jáne Ekonomıka mınıstrlikteri qatańdyq pen tabandylyq tanytýy kerek. Bıýdjet qarjysyn ıgerýdiń qazirgi krıterııinen bas tartyp, memlekettik ınvestıtsııanyń tıimdiligin basqarýdy kúsheıtkenimiz durys, - dedi Qasym-Jomart Toqaev.
Prezıdenttiń aıtýynsha, Úkimet pen ákimder bıýdjettiń ıgerilmeı qalýynan qaýiptenip, jobalarǵa qarjy bólý tájirıbesin doǵaratyn kez keldi.
- Eń soraqysy, mundaı sheshimder sýbektıvti túrde qabyldanyp, qarjy tańdaýlylarǵa ǵana beriledi. Toqeteri, árkim óz bilgenin jasaǵandy qoıý kerek. Endi mundaıdy memleket múddesine qasaqana qarsy áreket etý dep qarastyramyz. Bıýdjet qarjysy azamattarymyzǵa naqty paıda ákeletin jáne ulttyq ekonomıkanyń damýyna septigin tıgizetin jobalarǵa berilýge tıis. Úkimetke bıyl 1 mamyrǵa deıin bıýdjet baǵdarlamalaryna revızııa júrgizip, memleket esebinen qarjylandyrylatyn jobalardy irikteý mehanızmin jetildirý tapsyrylady. Bul kvazımemlekettik sektorǵa da qatysty. Men Joldaýda bul másele týraly aıttym: bıýdjettik shyǵyndardyń ashyqtyǵyn qamtamasyz etý úshin, ıaǵnı qarjynyń qaıda, qalaı jáne ne úshin jumsalyp jatqany aıqyn bolýy úshin tsıfrlyq teńgeni belsendi paıdalaný qajet. Qazirgi tańda bul tásil memlekettik satyp alý júıesinde, sýbsıdııalaý kezinde, sondaı-aq Ulttyq qordan iri jobalarǵa qarajat bólý barysynda tıimdi qoldanylyp júr. Bul quraldy basqa da salalarǵa engizip, aıasyn keńeıtý kerek, - dedi Memleket basshysy.
Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.