Prezıdent BUU-nyń qarýsyzdaný máselesi jónindegi joǵarǵy ókilin qabyldady

ASTANA. KAZINFORM - Qasym-Jomart Toqaev BUU Bas hatshysynyń orynbasary, Qarýsyzdaný máseleleri jónindegi joǵarǵy ókil Izýmı Nakamıtsýdy qabyldady, dep habarlaıdy Aqordanyń baspasóz qyzmeti. 

Kezdesý barysynda aımaqtyq jáne halyqaralyq qaýipsizdikti qamtamasyz etý, qarýsyzdaný men ıadrolyq qarýdy taratpaý isinde Qazaqstannyń BUU ınstıtýttarymen jan-jaqty yqpaldastyǵynyń perspektıvalary talqylandy.

Memleket basshysy BUU Bas hatshysynyń orynbasaryna iltıpat bildire otyryp, Uıym qazirgi zamannyń ózekti problemalaryn sheshýde aıryqsha ról atqaratynyn jáne onyń ornyn eshqandaı qurylym almastyra almaıtynyn atap ótti.

– Qazaqstannyń qarýsyzdaný jáne jappaı qyryp-joıatyn qarýlardy taratpaý máselesine qatysty ustanymy berik. Qazirgi álemde bolyp jatqan oqıǵalar turǵysynan alǵanda, bul máselelerdiń ózektiligi men mańyzdylyǵy arta tústi. Munyń alańdaýshylyq týǵyzatyny sózsiz. Erteń biz Halyqaralyq ıadrolyq synaqtarǵa qarsy is-qımyl kúnin atap ótemiz. Bul – búkil adamzat balasyna ıadrolyq synaqtar júrgizýdiń ári ıadrolyq qarýdy qoldanýdyń qaýipti ekenin eske salatyn óte mańyzdy data. Elimiz BUU ınstıtýttarymen tyǵyz baılanys ornatýǵa beıil ári Uıymdy balamasy joq, ámbebap halyqaralyq qurylym retinde qarastyrady, – dedi Prezıdent.

Izýmı Nakamıtsý Qazaqstannyń ıadrolyq qarýdy taratpaý jónindegi jahandyq úderiste kóshbasshylyǵyn joǵary baǵalady. Sondaı-aq, elimizdiń orta derjava retindegi róli artyp kele jatqanyn erekshe atap ótti.

Kezdesýde Qasym-Jomart Toqaev pen Izýmı Nakamıtsý halyqaralyq kún tártibindegi ózekti máseleler týraly pikir almasty.