Prezıdent BUU-nyń 80 jyldyq eńbegin álemniń esine saldy — Aıgúl Quspan
ASTANA. KAZINFORM — Májilis depýtaty, Palatanyń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan Memleket basshysy Qasym-Jomart Toqaevtyń BUU Bas Assambleıasynyń 80-shi sessııasy aıasyndaǵy Jalpy debatta halyqaralyq qaýipsizdik týraly aıtqan paıymdarynyń astaryna toqtaldy.
— Bul Birikken Ulttar uıymyn jaqtap sóılegen aýqymdy málimdeme boldy. Prezıdent keıingi 80 jyl boıy BUU-nyń kúsh salýynyń arqasynda adamzat ıadrolyq qaýiptiń betin qaıtaryp, bitimgerlikti damyta alǵanyn atap ótti. BUU arqasynda búkil adamzat bolyp ornyqty damý úshin kúresip, adam quqyqtaryn qorǵaı alǵanymyzdy eske saldy. Ol qazir osy biregeı uıymdy qorǵap, úzdik keıpinde saqtap qalýdyń teńdessiz múmkindigi bar ekenin aıtty. Biraq ol úshin BUU-da qazirgi talaptarǵa saı bolyp, úmittiń sımvol bolyp qala berý kerektigin sóz etti. Óıtkeni kóptegen halyq úshin BUU shynymen de úmittiń sımvoly, — dedi Májilis ókili.
Onyń sózinshe, halyqaralyq quqyqty buzý qalypty jaǵdaıǵa aınalǵan qazirgi kezeńde BUU-ny kúsheıtý mańyzdy.
— Memleket basshysy BUU Qaýipsizdik keńesin reformalaý qajettigine toqtaldy. Ol reformanyń naqty tetikterin atamasa da, BUU búkil qurlyqtardaǵy elderdiń úni estiletin uıym bolatyndaı ózgeristen ótý qajettigin atady. Osyǵan baılanysty Afrıka men Latyn Amerıkasyn, Azııany atap ótti. Osy qurlyqtardaǵy kóptegen eldiń BUU-da daýsy eskerilip jatqan joq. Qazaqstan sııaqty orta derjavalardyń úni BUU-da estilýi kerektigin aıtty.
Men úshin Prezıdenttiń búgin sóılegen sózi Birikken Ulttar uıymyn jaqtap sóılegen jalyndy málimdeme boldy. Men sony kúttim de. Bul uıymdy qazir óte kóp synap ketti. Biraq bul uıymnyń keıingi 80 jylda tyndyrǵan sharýasy da kóp. BUU-ny saqtap qalý kerek. Óıtkeni adamzat ornyna basqa sátti eshteńe usyna alyp otyrǵan joq, — deıdi depýtat.
Buǵan deıin habarlaǵanymyzdaı, Memleket basshysy BUU Bas Assambleıasynyń mereıtoılyq 80-sessııasynyń Jalpy debatynyń ashylýyna qatysty.
Prezıdent Qasym-Jomart Toqaevtyń Nıý-Iork tórinde BUU minberinen sóılegen sózin Jibek Joly arnasy tikeleı efırde kórsetti.
Aqordanyń baspasóz qyzmeti Memleket basshysy Qasym-Jomart Toqaevtyń BUU Bas Assambleıasynyń 80-shi sessııasyndaǵy Jalpy debatta sóılegen sóziniń tolyq nusqasyn jarııalady.