Prezıdent: BUU-ny jan-jaqty reformalaý strategııalyq qajettilikke aınalýǵa tıis
ASTANA. KAZINFORM – Prezıdent BUU-ny jan-jaqty reformalaý jaı áńgime kúıinde qalmaı, ortaq basymdyqqa jáne strategııalyq qajettilikke aınalýǵa tıis ekenin aıtty.
Memleket basshysy geosaıası turǵydan jikke bólinýdiń kúsheıýi men iri derjavalar arasyndaǵy senimniń tómendeýi saldarynan BUU múmkindikteri barǵan saıyn shektele túskenine nazar aýdardy. Sol sebepti Uıymdy jan-jaqty reformalaý jaı áńgime kúıinde qalmaı, ortaq basymdyqqa jáne strategııalyq qajettilikke aınalýǵa tıis.
– Kez kelgen mańyzdy reforma BUU Jarǵysyna saı iske asyrylýy kerek. Egemendik, aýmaqtyq tutastyq jáne daý-damaıdy beıbit jolmen retteý sekildi negizgi qaǵıdattar múltiksiz saqtalýǵa tıis, eshkimge artyqshylyq berilmeýi qajet. Sonymen birge Jarǵynyń keıbir erejeleri HHІ ǵasyrdyń talaptaryna sáıkes kelmeıdi. Sonyń ishinde Uıymǵa aıtarlyqtaı qoldaý kórsetip kele jatqan Japonııaǵa jáne basqa da elderge qatysty ádiletsizdik bar. Álem ózgerdi, al Jarǵy osy ózgeristerdiń sońynan ilese almaı otyr. Jaýapty dıalogqa kóship, keleshekte qujattyń senimdiligi men ózektiligin qamtamasyz etýdiń ýaqyty keldi dep sanaımyn, – dedi Qasym-Jomart Toqaev.
Prezıdent orta derjavalardy BUU Qaýipsizdik keńesine keńinen qatystyrýǵa shaqyrdy. Memleket basshysy Qaýipsizdik Keńesin reformalaý keıinge ysyrýǵa bolmaıtyn óte mańyzdy mindet ekenine toqtaldy.
Prezıdent atalǵan organ qyzmetine orta derjavalardy, Azııa, Afrıka jáne Latyn Amerıkasy elderin keńinen qatystyrýǵa shaqyrdy.
– Qaýipsizdik Keńesinde jaýapty orta derjavalardyń úni anyq estilýge tıis. Olar iri oıynshylar arasynda qaıshylyqtar bolǵan jaǵdaıda araaǵaıyndyq jasap, sheshimderdi ilgeriletýge septigin tıgize alady. Qazaqstan syrtqy saıasattaǵy mıssııasyn osy baǵytpen baılanystyrady. Biz berik ustanymǵa negizdelgen teńgerimdi, syndarly, kópvektorly dıplomatııa júrgizemiz. Bul bizdiń ulttyq múddemizge saı keledi ári udaıy BUU Jarǵysyna súıenetin damýshy orta derjava retindegi bolmysymyzdy kórsetedi, – dedi Prezıdent.
Qasym-Jomart Toqaev oraıly sátti paıdalanyp, elderimiz arasyndaǵy baılanysty jolǵa qoıýǵa zor úles qosqan Japonııanyń burynǵy Syrtqy ister mınıstri Erıko Kavagýchı hanymǵa rızashylyǵyn bildirdi. Prezıdent onyń «Ortalyq Azııa jáne Japonııa» sammıtine bastamashy bolǵanyn eske saldy.