Prezıdent BUU minberinen Qazaqstannyń ustanymyn anyq baıqatty – Erlan Qarın

ASTANA. KAZINFORM – Memleket basshysy Qasym-Jomart Toqaev BUU Bas Assambleıasynyń mereıtoılyq sessııasynda mańyzdy sóz aıtyp, jahandyq kún tártibine qatysty kózqarasyn bildirdi. Bul týraly Memlekettik keńesshi Erlan Qarın óziniń Telegram paraqshasynda jazdy.

Prezıdent qazirgi álemdik damýdyń tereń úrdisterin aıqyndap kórsetkenin atap ótti. Bulardyń qatarynda senim daǵdarysy, halyqaralyq quqyqtyń álsireýi, mılıtarızatsııa, klımattyń ózgerýi, tehnologııalyq alshaqtyq qaýpi bar.

- Atalǵan úrdister jóninde qazir túrli saıasatkerler men sarapshylar aıtyp júr. Alaıda Memleket basshysy bulardy jeke-jeke másele retinde emes, álemdik qaýymdastyqtan júıeli ári tıimdi sheshim talap etetin irgeli syn-qaterlerdiń birtutas kesheni retinde qarastyryp otyr. Prezıdent bıylǵy Joldaýda atap kórsetken BUU reformasynyń aýqymdy josparyn usyndy. Onda negizgi basymdyq Qaýipsizdik Keńesine berilip otyr. Atap aıtqanda, Keńesti Azııa, Afrıka jáne Latyn Amerıkasynyń iri memleketteri esebinen rotatsııalyq negizde keńeıtý, sondaı-aq orta derjavalardyń rólin kúsheıtý qamtylǵan, - dedi Erlan Qarın.

Sonymen qatar BUU Jarǵysyn jańartý, ıadrolyq qarýsyzdanýdy qaıta jandandyrý, bıologııalyq qaýipsizdikti qamtamasyz etý tetikterin qurý sekildi ózekti taqyryptar kóterildi.

- Prezıdenttiń baıandamasynan jańa jahandyq konsensýsty, senim men ashyqtyqqa, jaýapkershilik pen ádildikke, teńgerim men yntymaqtastyqqa, quqyqtyń berik saqtalýy men ortaq yntymaqqa negizdelgen jańa álemdik tártip arhıtektýrasyn qalyptastyrý ıdeıasy aıqyn kórindi. Mańyzdysy Prezıdent BUU minberinen Qazaqstannyń halyqaralyq qatynastardaǵy myqty da jaýapty sýbekt, dıplomatııa men tranzıtte, energetıka men tehnologııada altyn kópirge aınalǵan el retindegi áleýeti men ustanymyn anyq baıqatty, - dedi Memlekettik keńesshi.

Aıta keteıik, Qazaqstan Amerıkanyń bıznes kapıtandarymen birqatar kelisimge qol jetkizdi.