Prezıdent BUU minberinen ekologııalyq mańyzdy máseleni kóterdi — depýtat

ASTANA. KAZINFORM — Adamzat bolashaǵymyzǵa nuqsan keltiretin ózekti máselelerge nazar aýdarýy kerek. Bul týraly Memleket basshysynyń BUU Bas Assambleıasynyń mereıtoılyq 80-sessııasynyń Jalpy debatyndaǵy sózinen keıin Jibek Joly arnasynda Májilis depýtaty Aıgúl Quspan málim etti.

— Qazaqstan Prezıdenti qazir adamzat ekologııalyq problemalarǵa tıisti deńgeıde mán bermeı otyrǵanyn atap ótti. Bul turǵyda sý máselesi kúrdeli gýmanıtarlyq daǵdarysqa alyp kelýi múmkin. Sonymen qatar, BUU minberinen Memleket basshysy Alataý muzdyqtary tez erı bastaǵanyna, Kaspıı teńizi kúnnen kúnge tartylyp bara jatqanyna erekshe ekpin qoıdy. Sondyqtan barsha adamzat soǵys pen qaqtyǵysty doǵaryp, bolashaǵymyzǵa nuqsan keltiretin ózekti máselelerge nazar aýdarýy kerek, — dedi A. Quspan.

Osy oraıda depýtat Qazaqstan Prezıdenti Bas Assambleıaǵa 22 sáýirdi Halyqaralyq jer sharyn kógaldandyrý kúni dep jarııalaıtyn qarar qabyldaýdy usynǵanyn eske saldy. 

— Elimizdegi «Taza Qazaqstan» strategııasy men qorshaǵan ortany qorǵaý salasyndaǵy ózge de bastamalardyń aýqymy keń. BUU Bas Assambleıasynyń mereıtoılyq 80-sessııasynda Qasym-Jomart Toqaev adamzattyń bolashaǵyna qatysty dabyl qaqty. Bul baǵytta qazir Qazaqstan men Ortalyq Azııa óńiri barsha álemge óziniń ońtaıly tájirıbesin baıqatyp otyr, — dedi depýtat.

Budan buryn habarlanǵandaı, BUU Bas Assambleıasy 80-shi sessııasynyń Jalpy debatynda Qazaqstan Prezıdenti Qasym-Jomart Toqaev Bas Assambleıaǵa 22 sáýirdi Halyqaralyq jer sharyn kógaldandyrý kúni dep jarııalaıtyn qarar qabyldaýdy usyndy.

Munymen qosa Memleket basshysy Kaspııdiń sý qoryn saqtaý úshin jedel sharalardy birlese qabyldaý kerek ekenin atap ótti.