Prezıdent: BUU-ǵa ýaqyt talabyna saı kelmeıtin ıdeıalar men ustanymdardan arylý qajet
ANTALIıA. KAZINFORM – Qasym-Jomart Toqaev BUU-nyń 80 jyldyq tarıhy men onyń qazirgi róli týraly pikir bildirdi. Bul týraly Aqordanyń baspasóz qyzmeti habarlady.
– Atalǵan Uıymnyń negizi 80 jyl buryn qalandy. Keıbir adamdar uıym ábden eskirdi, quldyrap bara jatyr degen pikir aıtady. Kelisýge týra keledi. Bizge BUU Jarǵysyna muqııat mán bergen jón. Jarǵyda «dushpan memleketter» degen uǵym bar. Ras, 80 jyl buryn bári túsinikti edi. Al qazir álgi «jaý elder» Uıymdy qarjylandyrý jáne beıbitshilikti qoldaý isinde mańyzdy ról atqaryp otyr. Eń bastysy – BUU-nyń bedelin kóterip, tıimdiligin arttyrý, - dedi ol.
Sodan soń Qasym-Jomart Toqaev preventıvti dıplomatııanyń qaqtyǵystardy toqtatýda óte ózekti ekenine mán berdi.
– Bul taqyryp burynnan talqylanyp keledi, keminde 30 jyl boldy. Biraq ózgergen eshteńe joq. Jaǵdaı dilmár sóz, deklaratsııa kúıinde qalyp jatyr. Óńirlik jáne jahandyq shıelenisterdi boljaýǵa basa mán bergen jón dep oılaımyn. Preventıvti dıplomatııa degenimiz – osy. Sonymen qatar biz kópjaqty tıimdi dıplomatııaǵa qoldaý kórsetý úshin kúsh-jigerimizdi biriktirý kerek, - dedi Qazaqstan Prezıdenti.
Óz kezeginde Soltústik Makedonııa prezıdenti Gordana Sılıanovska-Davkova Qasym-Jomart Toqaevtyń BUU óz jumysynda preventıvti dıplomatııaǵa basa nazar aýdarý kerek degen pikirine qoldaý bildirdi.
– Birikken Ulttar Uıymy men Eýropa Odaǵy áý basta álemde beıbitshilik ornatý úshin qurylǵan. Degenmen eki qurylym da soǵyspen betpe-bet kelip, sátsizdikke ushyrady. Nelikten bulaı boldy? Óıtkeni preventıvti dıplomatııa joq. Toqaev myrza preventıvti jáne proaktıvti dıplomatııa jaıynda aıtty. Saıası sheshimder qabyldaýda bizge osyndaı oń úlgi jetpeı tur, - dedi Soltústik Makedonııa prezıdenti.
Sondaı-aq paneldik pikirtalasqa Grýzııa Premer-mınıstri Iraklıı Kobahıdze qatysty.
Budan buryn Memleket basshysynyń Antalııa dıplomatııalyq forýmynyń paneldik sessııasyna qatysqanyn jazǵan edik.
