Prezıdent BUU Eriktiler baǵdarlamasynyń atqarýshy úılestirýshisi Toılı Kýrbanovty qabyldady
ASTANA. KAZINFORM – Qasym-Jomart Toqaev kezdesýde Qazaqstannyń volonterlik bastamalaryn dáıekti túrde qoldaǵany jáne Astanada ótip jatqan TMD volonterler forýmyna qatysqany úshin Toılı Kýrbanovqa rızashylyǵyn bildirdi.
Prezıdent Qazaqstan volonterlik qozǵalysty damytýǵa erekshe den qoıyp otyrǵanyn atap ótti. Buǵan elimizdiń 2026 jyldy BUU Bas Assambleıasy tarapynan qoldaý tapqan ornyqty damý jolyndaǵy Halyqaralyq eriktiler jyly dep jarııalaý jónindegi usynysy dálel bola alady.
– Biz eriktilikti memlekettik saıasat turǵysynan alǵanda, shynaıy patrıotızmniń jáne jastarǵa kórsetiletin memlekettik qoldaýdyń kórinisi retinde qarastyramyz. Meniń bastamammen jańa Konstıtýtsııaǵa volonterlik qaǵıdalary engizildi. Onda volonterlik qyzmetti yntalandyrý alǵash ret konstıtýtsııalyq deńgeıde bekitildi, – dedi Prezıdent.
Memleket basshysynyń aıtýynsha, Qazaqstanda Halyqaralyq eriktiler jyly aıasynda myńnan astam is-shara ótýde, elimizde volonterler sany 300 myńǵa jaqyndady.
Volonterlik qozǵalystyń 2030 jylǵa deıingi damý tujyrymdamasy ázirlenip jatyr. Volonterdiń tsıfrlyq pasporty engizilip, memlekettik qoldaý tetikteri men óńirlik ınfraqurylym jetildirilýde.
Toılı Kýrbanov BUU Eriktiler baǵdarlamasymen joǵary deńgeıde yntymaqtastyq ornaǵanyna, sondaı-aq Halyqaralyq eriktiler jyly aıasynda birlesken jumystardyń jolǵa qoıylǵanyna toqtalyp, volonterlik qozǵalysty ilgeriletýge nazar aýdarǵany úshin Qazaqstan Prezıdentine alǵys aıtty
– Qazaqstan – volonterlik qyzmet salasynda úlken bıikterdi baǵyndyrǵan biregeı el. Qazaqstannyń Eriktiler jylyn jarııalaý jónindegi bastamasyn 60-tan asa memleket qoldady. Sizder jahandyq trend qalyptastyryp jatyrsyzdar. «Taza Qazaqstan» sııaqty qoǵamdyq aktsııalaryńyz birqatar elde úlken qyzyǵýshylyq týdyrýda, – dedi BUU Eriktiler baǵdarlamasynyń atqarýshy úılestirýshisi.
Qasym-Jomart Toqaev Qazaqstandaǵy volonterlikti damytýǵa eleýli úles qosqany úshin BUU Eriktiler baǵdarlamasynyń atqarýshy úılestirýshisi Toılı Kýrbanovty ІІ dárejeli «Dostyq» ordenimen marapattady.
Aıta keteıik, Qasym-Jomart Toqaev sırek metaldardy barlaý men óńdeýdi kúsheıtýdi tapsyrdy.
