Túrkistanda jaýyn-shashyn jasandy jolmen jaýady: Qazaqstan óńirde tehnologııany paıdalanǵan alǵashqy el bolmaq
ASTANA.KAZINFORM - Memleket basshysy BUU Dúnıejúzilik meteorologııa uıymynyń prezıdenti, BAÁ Ulttyq meteorologııa ortalyǵynyń bas dırektory Abdýlla Ál-Mandýsty qabyldady. Bul týraly Aqorda habarlady.
Kezdesýde Prezıdent Qasym-Jomart Toqaev BUU-nyń arnaýly mekemesi sanalatyn Dúnıejúzilik meteorologııa uıymy klımat, aýa raıy, sý resýrstary jáne tabıǵı apattardyń qaterin azaıtý baǵytyndaǵy jahandyq yntymaqtastyqty ilgeriletýde negizgi ról atqaratynyn atap ótti.
Memleket basshysy men Uıym jetekshisi Qazaqstan úshin strategııalyq mánge ıe klımat máselelerine erekshe nazar aýdardy. Atap aıtqanda, erte habarlaý júıesin damytý, meteorologııalyq ınfraqurylymdy jańǵyrtý jáne ǵylymı derekter almasý óte mańyzdy.
Prezıdent Qazaqstan tarapynyń BAÁ Ulttyq meteorologııa ortalyǵymen ózara baılanysty arttyrýǵa daıyn ekenin rastady.
Budan bólek, óńirlik jáne jahandyq deńgeıdegi sý qaýipsizdigi men sý resýrstaryn basqarý máselelerin sheshýdiń ózektiligine mán berildi. Bul rette Qazaqstannyń BUU aıasynda Halyqaralyq sý uıymyn qurý jónindegi bastamasynyń mańyzy aıryqsha.
Túrkistan oblysy BAÁ Ulttyq meteorologııa ortalyǵymen birge sý qoımalaryn toltyrý jáne aýyl sharýashylyǵy jerlerine sý jetkizý maqsatynda jaýyn-shashyndy jasandy jolmen shaqyratyn bastamany júzege asyrady. Atalǵan joba bıyl 17 mamyrda iske qosylady.
Osylaısha, Qazaqstan óńirde jasandy jańbyr tehnologııasyn paıdalanǵan alǵashqy el bolmaq.
Prezıdent TMU beıresmı sammıtine qatysý úshin Túrkistan qalasyna barǵanyn jazǵan bolatynbyz.
