Prezıdent BUU Bas hatshysynyń Sý resýrstary jónindegi arnaýly ókilin qabyldady
ASTANA. KAZINFORM – Memleket basshysy BUU Bas hatshysynyń Sý resýrstary jónindegi arnaýly ókili Retno Marsýdıdi qabyldady. Bul týraly Aqordanyń baspasóz qyzmeti habarlady.
Kezdesýde sý resýrstarynyń jahandyq jáne óńirlik kún tártibindegi negizgi máseleleri talqylandy.
Qasym-Jomart Toqaev Qazaqstan úshin sý ornyqty damý, ekologııalyq qaýipsizdik jáne óńirdegi turaqtylyqpen tikeleı baılanysty strategııalyq resýrs sanalatynyn atap ótti.
Prezıdent saladaǵy halyqaralyq yntymaqtastyqtyń anaǵurlym tıimdi arhıtektýrasyn qalyptastyrýdyń mańyzy erekshe ekenine nazar aýdardy.
Osy oraıda Memleket basshysy BUU aıasynda Halyqaralyq sý uıymyn qurý jóninde kótergen bastamasyna arnaıy toqtaldy.
Qasym-Jomart Toqaevtyń aıtýynsha, bul qadam sý resýrstaryn utymdy paıdalaný, sý problematıkasyna qatysty syn-qaterler boıynsha halyqaralyq úılestirý tetigin keńeıtý jáne ornyqty sheshimderdi ilgeriletý jónindegi jahandyq kúsh-jigerge tyń serpin beredi.
Aldaǵy kúnderi Astanada ótetin Óńirlik ekologııalyq sammıtte atalǵan qurylymdy qalyptastyrý parametrleri men perspektıvasyn egjeı-tegjeıli talqylaýǵa baǵyttalǵan halyqaralyq konsýltatsııalardyń alǵashqy kezeńin bastaý josparlanyp otyr.
Sonymen qatar bıyl jeltoqsan aıynda Abý-Dabıde ótetin Sý resýrstary jónindegi BUU konferentsııasy saladaǵy túıtkilderdi sheshýdiń ózara kelisilgen tásilderin ázirleıtin alań rólin atqaratyny aıtyldy.
Qasym-Jomart Toqaev pen Retno Marsýdı Ortalyq Azııa óńirinde sý resýrstaryn tıimdi paıdalaný máselesi jóninde pikir almasty.
Eske sala keteıik, buǵan deıin Memleket basshysy Túrkııa Respýblıkasynyń Vıtse-prezıdenti Djevdet Iylmazben kezdeskenin habarlaǵanbyz.
