Prezıdent BUU Bas hatshysynyń Órkenıetter alıansy jónindegi joǵary ókilin qabyldady

ASTANA. KAZINFORM – Memleket basshysy Qasym-Jomart Toqaev BUU Bas hatshysynyń Órkenıetter alıansy jónindegi joǵary ókili Mıgel Anhel Moratınosty qabyldady. Bul týraly Aqordanyń baspasóz qyzmeti habarlady. 

Qasym-Jomart Toqaev Mıgel Anhel Moratınosty Birikken Ulttar Uıymynyń ıslam fobııasymen kúres jónindegi arnaýly ókili bolyp taǵaıyndalýymen quttyqtady.

Memleket basshysy elimiz órkenıetter, mádenıetter jáne dinder arasyndaǵy ózara túsinistik pen qurmetti ilgeriletýdiń negizgi alańy sanalatyn BUU Órkenıetter alıansymen yntymaqtastyqqa basa mán beretinin jetkizdi.

Prezıdent Álemdik jáne dástúrli dinder kóshbasshylarynyń sezin ótkizýge turaqty qoldaý bildirip kele jatqan, sondaı-aq forým aıasynda Qazaqstan tarapymen birlesip dinı nysandardy qorǵaý máselelesi boıynsha arnaıy sessııa uıymdastyrǵan Alıanstyń qyzmetin joǵary baǵalady.

BUU Bas hatshysynyń joǵary ókili Qazaqstanda júzege asyrylǵan reformalardyń mańyzyn atap ótip, Sezd qorytyndysy beıbitshilikti, kelisim men dinaralyq dıalogty nyǵaıtýǵa yqpal etetinine senim bildirdi.

Kezdesý sońynda Qasym-Jomart Toqaev Mıgel Anhel Moratınosty dinaralyq dıalogqa qosqan úlesi úshin Astana halyqaralyq syılyǵyn ıelenýimen quttyqtady.

Eske sala keteıik, buǵan deıin Memleket basshysy Ierýsalım Patrıarhy III Feofılmen kezdeskenin jazǵan edik.