Prezıdent BUU Bas assambleıasynda Qazaqstandaǵy saıası júıe týraly aıtyp berdi
«Osynaý qıyn kezeńde bizge «Sabaqtastyq, ádildik, progress» uranymen qoǵamymyzdy jalpyqamtýshy qaıta túrlený jolynda júrýdi jalǵastyrý qajet. Qazaqstannyń saıası júıesindegi formýlam mynadaı: myqty strategııalyq oılaı biletin Prezıdent, yqpaldy Parlament jáne esep beretin Úkimet. Bul tujyrym elimizdiń negizgi qajettiligine saı keletinine jáne onyń beıbit ári turaqty bolashaǵyn qamtamasyz etetinine nyq senimdimin», dedi Qazaqstan Prezıdenti.
Memleket basshysy Qazaqstannyń jańa Prezıdenti retinde eń aldymen zamanaýı áleýmettik memleket qurýǵa shynaıy berilgenin aıtty. Al bul júıeniń sońǵy maqsaty - mıllıondaǵan qazaqstandyqtardyń aýqymdy reformalardyń ıgiligin paıdalanyp, myqty ekonomıkasy, joǵary sapaly bilim berý júıesi men zamanaýı medıtsınasy bar, temir qursaýlardan azat qoǵamda ómir súrý. Osy oraıda Qasym-Jomart Toqaev eger tereńnen saıası qaıta túrlený oryn almaıtyn bolsa, onda Qazaqstannyń áleýmettik-ekonomıkalyq damýdyń tabysty úlgisi bola almaıtynyn atap ótti.
«Buǵan qosa, Qazaqstandaǵy demokratııa – bul áli de jalǵasyp jatqan jumys ekenin eskergen jón jáne bul rette turaqty saraptama qajet. Biz ony únemi jetildirýge tyrysamyz, pozıtıvti aspektilerin damytýǵa, teris tájirıbelerden sabaq alýǵa umtylamyz. Óz baǵdarlamam aıasynda memleket pen qoǵam arasyndaǵy túsinikti dıalogqa septigin tıgizýi úshin Ulttyq qoǵamdyq senim keńesin qurdym», - dedi Memleket basshysy.
QR Prezıdenti «Ártúrli pikir – bir ult» ustanymy jaıynda da sóz qozǵap, alǵa qaraı ilgerileý pikir almasý men dıalog esebinen júzege asyrylýy tıistigin basa aıtty. Sonymen qatar barlyq quqyq qorǵaý organdary men sottar aýqymdy qaıta qurýdy bastan ótkizetindigine sendirdi. Bul barlyq salada jne azamattardyń kúndelikti ómirinde zań ústemdigin qoldaý úshin jasalady.
«Popýlızm – bul saıasatkerdiń darynsyzdyǵy, Men bos ýáde bermeımin. Men naqty istiń adamymyn. Men ózimniń reforma baǵdarlamalarymdy ómirde nyq júrgizetin bolamyn», - dedi Qasym-Jomart Toqaev.
