Prezıdent BUU Azyq-túlik jáne aýyl sharýashylyǵy uıymynyń bas dırektory Tsıýı Dýnıýımen kezdesti
RIM. KAZINFORM – Italııaǵa resmı sapary barysynda Memleket basshysy BUU Azyq-túlik jáne aýyl sharýashylyǵy uıymynyń (FAO) Rımdegi shtab-páterine bardy.
Qasym-Jomart Toqaev Tsıýı Dýnıýımen kezdesýde jahandyq azyq-túlik qaýipsizdigin qamtamasyz etýdiń jáne agroónerkásip kesheniniń ornyqty damýyn ilgeriletýdiń mańyzdylyǵyna nazar aýdaryp, Qazaqstannyń Uıymmen yntymaqtastyǵyn nyǵaıtýǵa múddeli ekenin jetkizdi.
– Azyq-túlik tapshylyǵy – jahandyq kún tártibindegi ózekti problemanyń biri. Qazaqstan bul máseleni sheshýge óz úlesin qosýǵa umtylady. Bizdiń elimiz dándi daqyldar ósirý jóninen aldyńǵy qatarda. Bıdaı eksportynyń kólemi shamamen 6 mıllıon tonnaǵa jetedi. Biz astyq jáne un óndiretin 10 iri memlekettiń qataryna kiremiz, – dedi Prezıdent.
Qasym-Jomart Toqaev Qazaqstannyń Uıymmen aradaǵy yntymaqtastyqty keńeıtýge múddeli ekenin rastady.
Memleket basshysynyń aıtýynsha, elimiz tuqym sharýashylyǵyn jetildirý, aýyl sharýashylyǵyna arnalǵan jerlerdiń tozýyna qarsy kúres, jasyl aýyl sharýashylyǵyn ilgeriletý, jer-sý resýrstaryn ońtaıly jáne tıimdi paıdalaný máseleleri boıynsha BUU saraptamalyq qoldaý kórsetedi dep úmittenedi. Qazaqstan jergilikti biregeı aýyl sharýashylyǵy ónimderin ótkizý úshin turaqty óndiris jáne saýda tizbekterin jetildirýdi kózdeıtin FAO-nyń «Bir el – bir negizgi ónim» bastamasyna qatysady.
