Prezıdent buryn saıası partııalar túrli sanattaǵy azamattarmen jumysqa kóńil bólmegenin ashyq aıtty

ASTANA. KAZINFORM – Memleket basshysy Qasym-Jomart Toqaev sońǵy jyldary elimizde jan-jaqty jańǵyrý jumystary qolǵa alynyp jatqanyn eske saldy.

«Sonyń ishinde saıası reformalardyń orny bólek. 2022 jyly referendým arqyly Konstıtýtsııaǵa mańyzdy ózgerister engizdik. Parlamenttiń rólin aıtarlyqtaı kúsheıttik... Jalpy, bılik tarmaqtarynyń jumysyn jetildirý úshin naqty sharalar qabyldadyq. Onda jergilikti ókildi bılikke qatysty máseleler de bar. Atap aıtsaq, oblystyq máslıhat saılaýy aralas júıe arqyly ótedi. Al aýdandyq depýtattar tek qana majorıtarlyq tásilmen saılanady. Bul qadam elimizdiń demokratııalyq jolmen damýyna zor serpin berdi dep senimmen aıta alamyz», — dedi Memleket basshysy.

Onyń paıymynsha, aýqymdy reformanyń nátıjesinde saıası báseke jandana tústi. Jańa erejege saı ótken saılaýdan keıin máslıhattarǵa jańa adamdar keldi.

«Alty saıası partııanyń ókilderi depýtat mandatyna ıe boldy. Qazir máslıhat músheleriniń onnan biri ǵana — partııalyq tizimmen kelgen depýtattar. Qalǵany — túgel bir mandatty okrýgten saılanǵan azamattar. Ózin-ózi usynǵan 434 adam depýtat atandy.

Ashyǵyn aıtsaq, buryn saıası partııalar túrli sanattaǵy azamattarmen jumysqa kóp kóńil bólmeıtin. Zańmen talap etkennen keıin ǵana mán bere bastady. Mysaly, partııalyq tizimde jastarǵa arnaıy kvota bólindi. Bul sheshim olardyń qoǵamdyq-saıası úderiske aralasýyna jol ashyp berdi. Buryn máslıhattaǵy jas azamattardyń úlesi 2 paıyzǵa da jetpeıtin. Qazir zańnamaǵa engizilgen ózgeristerdiń nátıjesinde bul kórsetkish eselep artty deýge bolady. Búgin de ortamyzda kóptegen jas depýtattar otyr. Olar túrli minberden jastarǵa qatysty ózekti máselelerdi batyl kóterip júr», - dedi Prezıdent.

Aıta keteıik, Astanada máslıhat depýtattarynyń ІІ respýblıkalyq forýmy ótip jatyr.