Toqaev: Bul óńirde ultymyzdyń taǵdyryn aıqyndaǵan asa mańyzdy sheshimder qabyldandy

TÚRKІSTAN. KAZINFORM – Memleket basshysy óz sózinde Túrkistanda qazaq halqynyń taǵdyryn aıqyndaǵan mańyzdy sheshimder qabyldanǵanyn atap ótti. 

– Túrkistan – Qazaq handyǵynyń saıası ortalyǵynyń biri ekenin eshqashan umytpaýymyz kerek. Bul óńirde ultymyzdyń taǵdyryn aıqyndaǵan asa mańyzdy sheshimder qabyldandy. Ordabasy jerinde osydan úsh ǵasyr buryn el bolashaǵyna aıryqsha áser etken úlken Quryltaı ótti. Bul biregeı jıynnyń mán-maǵynasy asa erekshe.

Quryltaıda úsh júzdiń bıleri jáne ıgi jaqsylary túgel bas qosyp, bir týdyń astyna jınaldy. Ult birliginiń arqasynda batyr babalarymyz Ańyraqaı shaıqasynda tarıhı jeńiske jetip, búkil syrt elderge qazaq eli tutastyǵynyń kúshin pash etti. Osyndaı eldik pen erlik dástúri eshqashan úzilgen emes.

Biz de tarıh jolyn jalǵastyryp, elimizde tóreli jıyn, tóbeli basqosýlar ótkizip kelemiz. Ulttyq quryltaıdyń ekinshi otyrysy Túrkistanda ótkenin jaqsy bilesizder. Men osy jerde «Adal azamat» tujyrymdamasyn alǵash ret jarııaladym.

Mamyr aıynyń ortasynda Túrkistanda Túrki memleketteri uıymynyń aıasyndaǵy tıisti memleketter basshylarynyń eń joǵary deńgeıdegi jıyny josparlanyp otyr. Bul – qazirgi álemdegi qubylmaly ahýalda ótkiziletin óte mańyzdy halyqaralyq shara. Úkimet pen ákimdik osy jıyndy minsiz uıymdastyrýǵa mán berýi kerek, - dedi Memleket basshysy.

Eske sala keteıik, buǵan deıin Prezıdent Qasym-Jomart Toqaev Qoja Ahmet ıAsaýı kesenesine zııarat etkenin jazǵan edik.