Prezıdent Chjao Letszıdi qabyldady
ASTANA. KAZINFORM - Memleket basshysy Búkilqytaılyq halyq ókilderi jınalysy Turaqty komıtetiniń tóraǵasy Chjao Letszıdi qabyldady. Bul týraly Aqorda habarlady.
Kezdesýde qazaq-qytaı máńgi jan-jaqty strategııalyq áriptestikti nyǵaıtý, parlamentaralyq dıalog, sondaı-aq mádenı-gýmanıtarlyq saladaǵy yntymaqtastyq perspektıvasy talqylandy.
– Búginde halyqtarymyzdyń arasyndaǵy tarıhı dostyq baılanystary ózara senim jáne shynaıy kórshilestik rýhynda oıdaǵydaı damyp jatyr. Qytaı árdaıym Qazaqstanǵa qoldaý kórsetip keledi. Sol úshin biz Qytaı halqyna, onyń basshylyǵyna jáne árıne, Tóraǵa Sı Tszınpın myrzaǵa shynaıy alǵysymyzdy bildiremiz. Biz úshin qazaq-qytaı máńgilik jan-jaqty strategııalyq áriptestigin udaıy negizde nyǵaıtý óte mańyzdy. 2025 jyl ekijaqty qarym-qatynasymyzdaǵy tarıhı ári teńdessiz kezeń boldy. Ózara saparlar san qyrly yntymaqtastyǵymyzdy tereńdetýge myqty serpin berdi. Mańyzdy jetistikterimizdiń biri – ózara saýda-sattyq kólemi rekordtyq deńgeıge, ıaǵnı, 49 mıllıard dollarǵa jetti. Qytaı dástúrli túrde Qazaqstannyń eń iri ınvestorlarynyń tobyna kiredi. Qytaılyq ınvestıtsııalardyń jıyntyq kólemi 29 mıllıard dollardan asty. Jaqynda men Investıtsııalardy kótermeleý jáne ózara qorǵaý týraly kelisimdi ratıfıkatsııalaıtyn zańǵa qol qoıdym. Bul qujat ınvestıtsııalyq yntymaqtastyǵymyzdyń damýyna jańa serpin beretini sózsiz, – dedi Qasym-Jomart Toqaev.
Prezıdent ekijaqty ári kópjaqty deńgeıdegi yqpaldastyqty odan ári ilgeriletý úshin berik saıası negiz qalyptasqanyna toqtaldy.
– Qazaqstannyń jáne Qytaıdyń halyqaralyq kún tártibindegi kóptegen másele boıynsha ustanymdary uqsas nemese birdeı. Birikken Ulttar Uıymy, Shanhaı yntymaqtastyq uıymy jáne Azııadaǵy ózara is-qımyl jáne senim sharalary jónindegi keńes aıasyndaǵy nátıjeli yqpaldastyǵymyzdy erekshe atap ótkim keledi. Qazaqstan Qytaı usynyp otyrǵan damý, órkenıetter dıalogy jáne jahandyq basqarý salalaryndaǵy mańyzdy bastamalardy joǵary baǵalaıdy ári qoldaıdy. Elimiz «Bir Qytaı» qaǵıdatyn berik ustanady. Sonymen qatar Qazaqstan «Ortalyq Azııa – Qytaı» jańa formatyndaǵy kópjaqty yntymaqtastyqty tolyqtaı qoldaıdy, – dedi Qasym-Jomart Toqaev.
Memleket basshysy oraıly múmkindikti paıdalanyp, QHR Tóraǵasy Sı Tszınpınge sálemi men izgi tilegin joldady.
Prezıdent Qytaı Halyq Respýblıkasynyń Tóraǵasy ustanǵan strategııalyq baǵyt-baǵdardyń tıimdiligin atap ótti.
– Jańa 15-shi besjyldyq jospar da Qytaıdy halyqaralyq sahnada mańyzdy ról atqaratyn álemdik derjava jáne joǵary damyǵan memleket retinde odan ári nyǵaıta túserine senemiz, – dedi Memleket basshysy.
Búkilqytaılyq halyq ókilderi jınalysynyń tóraǵasy Qazaqstan Prezıdentine QHR Tóraǵasynyń ystyq yqylasyn jetkizdi.
– Sońǵy jyldary Tóraǵa Sı Tszınpınniń jáne Sizdiń kóregen basshylyǵyńyz ben erekshe qamqorlyǵyńyzdyń arqasynda qytaı-qazaq qatynastary qarqyndy damyp, máńgi jan-jaqty strategııalyq áriptestik deńgeıine kóterildi. Byltyr Siz Tóraǵa Sı Tszınpınmen Astanada jáne Tıantszınde eki márte kezdesip, elderimizdiń yqpaldastyq baǵyttaryn aıqyndadyńyzdar, – dedi Chjao Letszı.
Sonymen qatar Búkilqytaılyq halyq ókilderi jınalysynyń tóraǵasy Qazaqstannyń jańa Konstıtýtsııasyn qabyldaý boıynsha jalpyulttyq referendýmnyń tabysty ótýimen quttyqtap, Ata zańǵa engizilgen ózgerister memlekettiń uzaqmerzimdi damýy turǵysynan strategııalyq mańyzdy sheshim bolǵanyna nazar aýdardy.
