Prezıdent Búkilálemdik taekvondo federatsııasynyń prezıdenti Chýngvon Choýdy qabyldady
ASTANA. KAZINFORM – Memleket basshysy Qasym-Jomart Toqaev Búkilálemdik taekvondo federatsııasynyń (WT) prezıdenti Chýngvon Choýdy qabyldady. Bul týraly Aqordanyń baspasóz qyzmeti habarlady.
Prezıdent Qasym-Jomart Toqaev Chýngvon Choýdyń sapary Qazaqstannyń sport qaýymdastyǵy úshin mańyzdy oqıǵa sanalatynyn atap ótti. Sondaı-aq bul Búkilálemdik taekvondo federatsııasynyń elimizde atalǵan sport túriniń damýyna jan-jaqty qoldaý kórsetýge daıyn ekenin bildiredi.
Memleket basshysy taekvondo olımpıadalyq sport túri ǵana emes, úılesim, tártip jáne ózara qurmet qaǵıdattaryna negizdelgen, dúnıe júzindegi mıllıondaǵan adamdy biriktiretin fılosofııa dep sanaıdy.
Qasym-Jomart Toqaevtyń aıtýynsha, elordada G1 sanatyndaǵy Kazakhstan Open 2025 halyqaralyq reıtıng týrnırin ótkizý otandyq sportshylardyń kásibı turǵydan shyńdalýyna, tájirıbe almasýyna ári Ulttyq federatsııanyń básekege qabilettiligin kóterýge keńinen jol ashady.
Memleket basshysy birlesken kúsh-jigerdiń nátıjesinde Qazaqstanda taekvondonyń tanymaldylyǵy artyp, halyqtar arasyndaǵy baılanys nyǵaıa túsetinine senim bildirdi.
Chýngvon Choý qonaqjaılyq tanytyp, Qazaqstanda taekvondonyń damýyna árdaıym qoldaý kórsetip kele jatqany úshin Prezıdent Qasym-Jomart Toqaevqa alǵys aıtty.
Búkilálemdik federatsııa basshysy erteńgi týrnırdiń uıymdastyrylýyna jáne elimizdegi osy sport túrine qyzyǵýshylyq deńgeıine joǵary baǵa berdi. Sonymen qatar qazaq sportshylarynyń halyqaralyq arenadaǵy tabysyna toqtaldy.
Kezdesý sońynda Qazaqstan Prezıdenti álemde taekvondonyń damýyna eleýli úles qosqany úshin Chýngvon Choýdy ІІ dárejeli «Dostyq» ordenimen marapattady.
Óz kezeginde Búkilálemdik taekvondo federatsııasynyń prezıdenti Memleket basshysyna erekshe qurmettiń belgisi retinde toǵyzynshy dan qara belbeýin tabys etti.
Prezıdent jattyǵý taqtaıshasyna qoltańba qaldyrdy. Sondaı-aq Chýngvon Choýdyń ótinishimen taekvondo dástúrine saı taqtaıdy syndyrdy.
Eske sala keteıik, buǵan deıin Memleket basshysynyń Armenııa Premer-mınıstrimen telefon arqyly sóıleskenin habarlaǵan edik.