Prezıdent: Búkil álem Qazaqstannyń jańa mazmun men beıinge ıe bolǵanyn moıyndaıdy
ASTANA. QazAqparat – Qazaqstan ulttyq múddeni qorǵaýǵa, beıbitshilik, senim jáne yntymaqtastyq qundylyqtaryn ilgeriletýge baǵyttalǵan belsendi syrtqy saıasat júrgizedi. Bul týraly búgin Almaty jurtshylyǵymen kezdesý barysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Biz ózimizdiń progressıvti kún tártibimizdi ilgeriletýimiz qajet. Bul bizdiń qazirgi zamanǵy geosaıası shyndyqta róli artyp otyrǵan dıplomatııamyzǵa da qatysty. Qazaqstan ulttyq múddeni qorǵaýǵa, beıbitshilik, senim jáne yntymaqtastyq qundylyqtaryn ilgeriletýge baǵyttalǵan belsendi syrtqy saıasat júrgizedi. Syrtqy saıasatymyz elimizdiń qaýipsizdigin nyǵaıtýǵa, ınvestıtsııa tartýǵa, kólik-tranzıttik áleýetti damytýǵa, eksportty ilgeriletýge baǵyttalǵan. Munyń bári túptep kelgende halqymyzdyń ál-aýqatyn arttyrýǵa septigin tıgizedi», - dedi QR Prezıdenti.
Memleket basshysy Qazaqstan halyqaralyq máselelerde barlyq ýaqytta Birikken Ulttar Uıymynyń ámbebap qaǵıdattaryn ustanatynyn basa aıtty. Degenmen, bul uıymnyń ózi de reformalardy qajet etip otyraǵanyn atap ótti.
«Bul ásirese álemniń ártúrli óńirlerinde áskerı janjaldar týyndap, memleketter arasyndaǵy senimsizdik artqan, terrorıstik jáne gıbrıdti qaterler kúsheıgen kezde óte mańyzdy. Eýrazııanyń dál ortasynda ornalasqan Qazaqstan olardyń áserin sezinedi. Biraq, túpkilikti maqsaty qýatty memleket, ádiletti qoǵam qurý bolatyn reformalardyń belgilengen jolynan taımaımyz», - dedi Qasym-Jomart Toqaev.
QR Prezıdenti jalpyulttyq dıalogtyń, azamattyq qoǵamnyń belsendiliginiń arqasynda aýqymdy saıası túrlený sezilip otyrǵanyna nazar aýdartty. Saıası reformalardyń 4 toptamasy júzege asyrylǵanyn aıtty.
«Bul reformalar halyqaralyq qoǵamdastyqtyń qoldaýyna ıe bolyp otyr. Qazaqstandy jańǵyrtý baǵytyndaǵy kúsh-jigerimizdi reformalardy shekteý dep, buǵan sheteldik saıasattanýshylar men sarapshylardy ılandyrýǵa tyrysyp júrgenderdiń áreketi múldem qate. Shyndyǵynda óte úlken jumys jasaldy. Búkil álem Qazaqstannyń jańa mazmun men beıinge ıe bolǵanyn moıyndaıdy. Munda eshqandaı asyra aıtý joq. Eń bastysy reformalar munan ary damyp keledi. Qazaqstan qarqyndy damyp, barlyq toqyraýǵa ushyraǵan qubylystardan arylatyn bolady», - dedi Memleket basshysy.
