Prezıdent búgingi kóshbasshylardyń boıynan tabylýǵa tıis qasıetterdi atady
ASTANA. KAZINFORM – Prezıdent Qasym-Jomart Toqaev Antalııa dıplomatııalyq forýmynyń «Mapping Tomorrow, Managing Uncertainties» paneldik sessııasyna qatysty. Jıynda ol búgingi kóshbasshylardyń boıynan tabylýǵa tıis qasıetterge toqtaldy, dep habarlaıdy Aqorda.
– Jahandyq kóshbasshylar, álemniń ár qıyryndaǵy jekelegen memleketterdiń jetekshileri, eń aldymen, halyqaralyq qaýipsizdik pen beıbitshilik máselelerine jaýapkershilikpen qaraýy qajet dep sanaımyn. Qazirgi sátte strategııalyq ustamdylyq óte mańyzdy. Meniń oıymsha, búgingi kúrdeli ári qarama-qaıshylyqqa toly álemdegi shıelenisterdiń túıinin tarqatý asa qıyn emes. Jaı ǵana jaýapkershilik tanytyp, sabyrly bolý qajet, – dedi Qazaqstan Prezıdenti.
Memleket basshysy Taıaý Shyǵystaǵy ahýalǵa qatysty pikirin jetkizdi. Prezıdent kelissózder barysynda basty máselelerge den qoıý kerek dep sanaıdy.
– Álemde oryn alǵan jaǵdaılarǵa baıyppen qaraýǵa keńes berer edim. Máselen, bári Irandy talqylap jatyr. Árıne, bul eldegi ahýal óte kúrdeli. Oǵan qatysty qandaı da bir pikir aıtý qıyn. Qazaqstan Shyǵanaqtaǵy elderge tilektestigin bildirdi. Biz taraptardy strategııalyq ustamdylyqqa jáne áskerı is-qımyldy toqtatýǵa shaqyrdyq. Bul qaqtyǵystyń aýyr saldaryn bári sezindi. Eń áýeli ekonomıka quldyrady. Búginde Ormýz buǵazynda kemelerdiń erkin júzýine qoıylǵan tosqaýyl týraly aıtylyp jatyr. Biraq dálizdiń qaqtyǵysqa deıin erkin saýda jasaýǵa ashyq bolǵanyn eskerý qajet. Sondyqtan máseleniń mánine úńilgenimiz jón. Al túıtkil ıadrolyq tehnologııa men ıadrolyq qarýdyń taralýynda edi. Bul Iran tóńiregindegi qaqtyǵysqa qatysty kelissózderdiń basty taqyrybyna aınalýy kerek. Biraq qazir jahandyq saýda máselesin talqylaýǵa kóship kettik. Qıyndyqtarǵa qaramastan, ǵalamdyq saýda-sattyq kólemi ósip keledi. Byltyrdyń ózinde ósim 2,5 paıyzdy qurady. ıAǵnı álemdik saýdadaǵy jaǵdaı jaman emes. Alaıda saýda-sattyqtyń sapasy men mazmuny – úlken problema, – dedi Qasym-Jomart Toqaev.
Aıta keteıik, buǵan deıin Memleket basshysy paneldik sessııaǵa qatysý úshin NEST kongress ortalyǵyna barǵany habarlandy.