Prezıdent Birikken Arab Ámirlikteriniń Qazaqstandaǵy elshisin qabyldady

ASTANA. KAZINFORM — Memleket basshysy BAÁ-niń Qazaqstandaǵy elshisi Muhammed Saıd Muhammed ál-Arıkıdi qabyldady. Qasym-Jomart Toqaev Astanada ótken ShYU sammıtine Birikken Arab Ámirlikteriniń ókildi delegatsııasynyń qatysqany úshin alǵys aıtty.

Memleket basshysy elimiz BAÁ-men kópjaqty yntymaqtastyqty damytýǵa erekshe mán beretinin atap ótti.

Kezdesýde buǵan deıin joǵary deńgeıde qol jetkizilgen saýda-ekonomıka jáne ınvestıtsııa salalaryndaǵy ýaǵdalastyqtardy júzege asyrý barysy talqylandy.

Sondaı-aq Qazaqstan men BAÁ arasyndaǵy strategııalyq ınvestıtsııalyq jobalar týraly birlesken deklaratsııa aıasyndaǵy jumystardy jalǵastyrý qajet ekenine nazar aýdaryldy.

Sonymen qatar energetıka jáne kólik-logıstıka, aqparattyq tehnologııalar men jasandy ıntellekt salalaryndaǵy yntymaqtastyq perspektıvalary qarastyryldy.