Prezıdent birqatar zań men kodekske túzetý engizetin zańǵa qol qoıdy
ASTANA.KAZINFORM - Memleket basshysy «Qazaqstan Respýblıkasynyń keıbir zańnamalyq aktilerine orman sharýashylyǵy, erekshe qorǵalatyn tabıǵı aýmaqtar jáne jeke kásipkerlik sýbektileriniń mindettemelerine kepildik berý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy. Bul týraly Aqordanyń baspasóz qyzmeti habarlady.
Zańmen Jer, Orman, Kásipkerlik, Eńbek jáne Bıýdjet kodeksterine, sondaı-aq 9 zańǵa túzetýler engizildi.
Túzetýlerdiń birinshi blogy erekshe qorǵalatyn tabıǵı aýmaqtar (EQTA) salasyndaǵy zańnamany jetildirýge baǵyttalǵan. Zańmen EQTA jerlerin ózge sanattaǵy jerlerge aýystyrý negizderi qaıta qaraldy.
Túzetýlerdiń ekinshi blogy halyqtyń qaýipsizdigin qamtamasyz etýge jáne EQTA aýmaqtarynda qorshaǵan ortaǵa zııan keltirýdiń aldyn alýǵa baǵyttalǵan.
Úshinshi blok Astana qalasynyń «jasyl beldeýin» qorǵaýdy jáne utymdy paıdalanýdy qamtamasyz etýge baǵyttalǵan.
Túzetýlerdiń tórtinshi blogy kómirtekti ofsetterdiń máselelerin retteıdi. Zań Orman kodeksi erejeleriniń qoldanylýy jańa orman ekpelerin otyrǵyzý, sondaı-aq tozǵan jáne buzylǵan jerlerdi qalpyna keltirý arqyly parnıktik gazdardy sińirýge baǵyttalǵan memlekettik orman qory jerlerinde satylatyn kómirtekti ofsetterdi satý jónindegi qyzmetke taratyldy.
Túzetýlerdiń besinshi blogy EQTA salasyndaǵy qyzmetkerlerdiń áleýmettik qorǵalýyn qamtamasyz etýge baǵyttalǵan.
Túzetýlerdiń altynshy blogy bıznes sýbektileriniń qaryzdaryna kepildik berý júıesin engizýdi kózdeıdi. Kepildik berý júıesiniń maqsaty – kásipkerlik sýbektilerine ekinshi deńgeıdegi bankterden kredıtter alý úshin olardyń kepilmen qamtamasyz etilýi jetkiliksiz bolǵan kezde qajetti qarjylandyrý kóleminiń qoljetimdiligin qamtamasyz etý.
Zań mátini baspasózde jarııalanady.
Memleket basshysy «Qazaqstan Respýblıkasynyń keıbir zańnamalyq aktilerine azamattyq qorǵaý, elektr energetıkasy jáne memlekettik múlikti basqarý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıǵanyn jazǵan edik.