Prezıdent birqatar memlekettiń elshilerinen senim gramotalaryn qabyldady
ASTANA. KAZINFORM — Astanada Táýelsizdik saraıynda segiz eldiń tótenshe jáne ókiletti elshisiniń Memleket basshysyna senim gramotalaryn tapsyrý rásimi ótti. Bul týraly Aqordanyń baspasóz qyzmeti málim etti.
Senim gramotalaryn Mysyr Arab Respýblıkasynyń elshisi Sameh Shehata, Shveıtsarııa Konfederatsııasynyń elshisi Krıstına Honegger-Zolotýhın, Estonııa Respýblıkasynyń elshisi Mare Lýýp, Oman Sultandyǵynyń elshisi Salah Djabýb, Majarstan elshisi Ferents Tsombosh, Gvıneıa-Bısaý Respýblıkasynyń elshisi Braıma Embalo, Nıgerııa Federatıvtik Respýblıkasynyń elshisi Djozef Olýsola Idjı men Danııa Koroldiginiń elshisi Lars Týesen tabystady.
Prezıdent elshilerge iltıpat bildirip, elimizdiń syrtqy saıasatta beıbit baǵyt ustanatynyn jetkizdi.
— Búgin — shyn máninde, elderińizdiń ókili retinde Sizder úshin de, Qazaqstan Respýblıkasy úshin de óte mańyzdy kún. Osy oraıda barlyǵymyz birlesip jumys isteýimiz qajet ekenine senimdimin. Óıtkeni Qazaqstan beıbitsúıgish el sanalady. Biz teńgerimdi jáne syndarly syrtqy saıasat ustanamyz. El ishinde reforma júrgizýge qolaıly jaǵdaı jasaýǵa umtylamyz. Syrtqy ister mınıstrliginiń, memlekettik organdardyń, sondaı-aq Prezıdent rezıdentsııasynyń Sizder úshin árdaıym esigi ashyq. Óıtkeni qazirgi turaqsyz ári qubylmaly álemde birge bolýǵa tıispiz, — dedi Qasym-Jomart Toqaev.
Eske sala keteıik, buǵan deıin Prezıdent Úndistan Premer-mınıstrin Qazaqstanǵa memlekettik saparmen kelýge shaqyrǵan bolatyn.
