Prezıdent BRIKS aıasynda jasandy ıntellekt boıynsha seriktestik qurýdy usyndy

— BRIKS qarqyndy damyp kele jatqan memleketterdiń tehnologııalyq áleýetin olardyń aýqymymen ushtastyryp, ınnovatsııa, ınvestıtsııa jáne turaqty ekonomıkalyq ósimniń jańa múmkindigin usyna alady. Qazaqstan úshin jasandy ıntellekt strategııalyq basymdyqqa ıe. Bul rette elimiz BRIKS plıýs aıasyndaǵy tıimdi yntymaqtastyqtyń aıasyn keńeıtý úshin aldyńǵy qatarly esepteý ınfraqurylymyn, sondaı-aq BUU-nyń ulttyq jáne tsıfrlyq ortalyqtaryn jumyldyrýǵa daıyn. Naqty shara retinde jasandy ıntellekt salasy boıynsha BRIKS plıýs seriktestigin iske qosýdy usynamyn. Onyń aıasynda ulttyq JI ortalyqtaryn biriktirýge, zerthanalar men ǵylymı jobalardy qoljetimdi etýge, sondaı-aq birlesip kóptildi sheshimder ázirleýge bolady, — dedi Prezıdent.

Qasym-Jomart Toqaevtyń pikirinshe, ornyqtylyq tehnologııalyq turǵydan alǵa basýmen ǵana ólshenbeıdi.

— Bárimiz úshin zor mańyzǵa ıe sý resýrstary máselesin kótergim keledi. Jahandyq deńgeıde sý resýrstaryn basqarý isi shashyrańqy júrgizilip keledi. Osy oraıda, álem elderiniń kúsh-jigerin bir arnaǵa toǵystyryp, memleketaralyq úılestirý jumystaryn nyǵaıtý úshin Halyqaralyq sý uıymyn qurýdy usyndyq. Ol BUU-nyń arnaýly qurylymy retinde qyzmet etedi. BRIKS-ke múshe memleketter men seriktesterimizdi osy mańyzdy jobany qoldaý úshin Qazaqstan bastamashy bolǵan halyqaralyq konsýltatsııalarǵa qosylýǵa shaqyramyn, — dedi Memleket basshysy.

Prezıdent sózin túıindeı kele, tıimdi kópjaqty yntymaqtastyq bolmasa, kóppolıarly júıe jikke bólinýdi odan saıyn ýshyqtyryp, adamzatqa qaýip tóndiretinin aıtty. Onyń pikirinshe, Qazaqstan egemendikke, múddelerdiń teńgerimine jáne ortaq jaýapkershilikke negizdelgen jasampaz kóppolıarly júıeni qoldaıdy. Qasym-Jomart Toqaev Nıý-Delıdegi sammıt naqty yntymaqtastyq pen birlesken progress arqyly osy kózqarasty ilgeriletýge yqpal eterine senim bildirdi. 

Buǵan deıin Toqaev transshekaralyq ınfraqurylymǵa tóngen qaýip týraly aıtty.