Prezıdent bir aptada 3 iri jıyn, 8 kezdesý ótkizdi — Rýslan Jeldibaı
ASTANA. KAZINFORM — Memleket basshysy Qasym-Jomart Toqaevtyń jumys aptasy óte qaýyrt boldy, dep habarlaıdy QR Prezıdentiniń keńesshisi — Baspasóz hatshysy Rýslan Jeldibaı.
Onyń sózinshe, apta quqyq qorǵaý organdarynyń keńeıtilgen alqa májilisinen bastaldy. Prezıdent «Zań men tártip» qaǵıdatyna saı qoǵamda quqyqtyq mádenıet qalyptastyrý máselesin kóterip, kúshtik qurylymdar men quqyq qorǵaý organdarynyń jumysyn odan ári jetildirýdiń negizgi baǵyttaryn aıqyndady.
Memleket basshysy «Egmont» qarjylyq barlaý bólimsheleri tobynyń tóraǵasy Eljbeta Frankov-ıAskevıchti qabyldap, sol kúni keshke Polıtsııa kúnine arnalǵan kontsertti tamashalady.
24 maýsymda Qasym-Jomart Toqaevtyń tóraǵalyǵymen Sheteldik ınvestorlar keńesiniń 37-shi plenarlyq otyrysy ótti. Jıynda Prezıdent ınvestorlarǵa jasalatyn qolaıly jaǵdaı men jeńildikterge toqtalyp, ekonomıkalyq ósim ákeletin áleýetti salalarǵa nazar aýdardy. Іs-shara aıasynda Qasym-Jomart Toqaev Eýropalyq qaıta qurý jáne damý bankiniń prezıdentimen, sondaı-aq elimizge ınvestıtsııa salǵan birqatar sheteldik kompanııa jetekshilerimen kezdesip, birlesken jobalardyń júzege asyrylý barysyn talqylady. Tústen keıin Memleket basshysy BAQ salasy qyzmetkerlerin marapattady. Sonymen qatar sot júıesi qyzmetiniń bıylǵy bes aıdaǵy qorytyndysy jóninde Joǵarǵy sot Tóraǵasy Aslambek Merǵalıevtiń esebin tyńdady.
25 maýsym kúni Prezıdent Aqtóbe oblysyna saparmen bardy. Qasym-Jomart Toqaev Keńes Odaǵynyń Batyry Álııa Moldaǵulovanyń Aqtóbe qalasyndaǵy memorıaldyq eskertkish keshenine gúl shoǵyn qoıyp, rýhyna taǵzym etti. Sodan keıin Memleket basshysy XI «Aıbyn» halyqaralyq áskerı-patrıottyq jastar jıynyn ashty. Qazaqtyń qaısar qyzy Álııa Moldaǵulovanyń 100 jyldyq mereıtoıy men Uly Jeńistiń 80 jyldyǵyna arnalǵan jıynǵa bıyl óz órenderimizben qatar dostas Reseı, Qyrǵyzstan, Ózbekstan, Belarýs jáne Ázerbaıjan elderinen 800-ge jýyq jas qatysty.
26-27 maýsym kúnderi halyqaralyq is-sharalarmen jalǵasty. Prezıdent Qasym-Jomart Toqaev IV Eýrazııalyq ekonomıkalyq forýmǵa jáne Joǵary Eýrazııalyq ekonomıkalyq keńes otyrysyna qatysý úshin Belarýs astanasyna saparlady. Mınsk tórindegi forýmda Memleket basshysy tsıfrlyq tehnologııalar men jasandy ıntellektiniń keleshegi jóninde oı-pikir bildirip, osy strategııalyq mańyzdy saladaǵy áleýetti nyǵaıtý úshin elimizde atqarylyp jatqan sharalarǵa toqtaldy. JEEK-tiń kezekti otyrysynda ekonomıkalyq ıntegratsııany odan ári damytý perspektıvasy, sondaı-aq Birlestiktiń negizgi seriktesterimen saýda-ekonomıkalyq yntymaqtastyq máseleleri talqylandy.
Memleket basshysy senbi kúni de jumys istedi. Ýolter Edýard Dendı atyndaǵy neırohırýrgııa qoǵamdastyǵynyń dúnıejúzilik H kongresine qatysý úshin Astanaǵa kelgen belgili medıtsına mamandarymen kezdesti.
— Jalpy, Prezıdent bir apta ishinde 3 iri jıyn, 8 kezdesý ótkizdi. Bir márte óńirge saparlap, shetelde ótken 3 halyqaralyq is-sharaǵa qatysty. Sondaı-aq apta ishinde Qasym-Jomart Toqaev Lıýksembýrg, Slovenııa, Mozambık elderiniń basshylaryna quttyqtaý hatyn joldap, Qatar Memleketiniń Ámirimen telefon arqyly sóılesti, — dep atap ótti Rýslan Jeldibaı Telegram-daǵy paraqshasynda.
Budan buryn Buqaralyq aqparat quraldary qyzmetkerleri kúni aıasynda Prezıdent Qasym-Jomart Toqaevtyń atynan «Dara» Prezıdenttik bastamalar qory Qazaqstannyń jetekshi medıa uıymdarynyń qyzmetkerlerine páter sertıfıkattaryn tabystady.