Prezıdent bıznesti tekseretinder jóninde: «shash al dese, bas alatyn» áreketti doǵarý kerek

ASTANA. KAZINFORM – Úkimet bıznesti qoldaý saıasatyn túbegeıli ózgertý týraly usynys ázirleý kerek. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

- Tsıfrlyq tehnologııalar men jasandy ıntellektini keńinen qoldaný kásipkerlikti qarqyndy damytýǵa zor múmkindik beredi. Jalpy ishki ónimniń 40 paıyzǵa, negizgi kapıtalǵa salynǵan ınvestıtsııanyń 70 paıyzǵa jýyǵy shaǵyn jáne orta bıznes salasyna tıesili. Bul – keıingi jyldary júrgizilgen júıeli jumystyń nátıjesi. Degenmen qazir tabysqa rıza bolyp otyratyn zaman emes. Elimizde azamattardyń bıznespen jappaı aınalysýyna mán berilip, oǵan barynsha jaǵdaı jasalyp jatyr. Biraq mundaı shara búgingi tańda azdyq etedi, - dedi Qasym-Jomart Toqaev.

Prezıdenttiń aıtýynsha, Úkimet kásipkerlikti damytý isinde endi, eń aldymen, sapaǵa aıryqsha kóńil bólýi kerek. Memlekettik kómekti bıznestiń tehnologııalyq deńgeıine jáne sanatyna qaraı saralap berý qajet. Shaǵyn bıznesti qoldaý sharalary naqty ári tıimdi bolýǵa tıis. Kásipkerlerdi «kúnkóris rejıminen» shyǵyp, turaqty damý jolyna túsýge yntalandyrý mańyzdy.

- Shıkizattyq emes sektordaǵy damý áleýeti joǵary orta bıznesti qoldaý sharalary daıyn ónim satatyn naryq aýqymyn keńeıtýge yqpal etýi qajet. Úkimet «Atameken» kásipkerler palatasymen birlesip, shaǵyn jáne orta bıznesti qoldaý saıasatyn túbegeıli ózgertý týraly usynys ázirleýi kerek. Usynystar 1 sáýirge deıin engizilýge tıis. Árbir kásipker smartfon arqyly tikeleı qoldana alatyn birtutas tsıfrlyq ekojúıe jasalýy qajet. Qazirgi retteý sharalary kásipkerlerge ákimshilik kedergi týǵyzady, materıaldyq shyǵyn keltiredi. Osy kedergiler men shyǵyndardy azaıtý úshin kezinde shaǵyn jáne orta bıznes nysandaryn tekserýge moratorıı jarııalandy. Biraq moratorıı merzimi aıaqtalǵan sátte bári qaıtadan burynǵy qalpyna tústi. Mysaly, 2020 jyly 70 myń tekserý jasalsa, byltyr bul kórsetkish 92 myńǵa deıin artqan. Tipti, onyń 85 paıyzy jospardan tys júrgizilgen. Shash al dese, bas alatyn mundaı áreketti doǵarý kerek. Mundaı tekserýlerdiń ornyna medıtsınalyq qordy nemese jekemenshik mektepterdi, áleýmettik jeńildikter berý júıesin tekserý kerek edi, - dedi Memleket basshysy.

Prezıdenttiń sózine qaraǵanda, retteýshilik reformanyń jańa kezeńindegi basty mindet – blokcheın men jasandy ıntellektini paıdalaný arqyly tsıfrlyq modelge tolyq ótý.

- Bul rette «Retteýshi sary paraqtar» (Regulatory Yellow Pages) qaǵıdaty basshylyqqa alynýǵa tıis. Strategııalyq josparlaý jáne reformalar agenttigi atalǵan jumysty jyl sońyna deıin aıaqtaýy qajet, - dedi Qasym-Jomart Toqaev.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.