Prezıdent bızneske qolaıly jaǵdaı jasaýdy memlekettik saıasattyń basym baǵytynyń biri retinde atady
ASTANA. KAZINFORM — Qasym-Jomart Toqaev bızneske qolaıly jaǵdaı jasaýdy memlekettik saıasattyń basym baǵytynyń biri retinde atady. Memleket basshysy bul týraly Qazaqstan-Túrkııa bıznes forýmynda aıtty.
– Qazir osy salada aýqymdy jumys atqarylyp jatyr. Prezıdent janyndaǵy Sheteldik ınvestorlar keńesi quryldy. Arnaıy Investıtsııalyq shtab jumys istep tur. «Bir tereze» qaǵıdatyna saı qyzmet kórsetetin Ulttyq tsıfrlyq platforma iske qosyldy. Sondaı-aq sheteldik kásipkerler Altyn Visa baǵdarlamasynyń ıgiligin qoldana alady. Biregeı vızanyń negizgi maqsaty – ınvestorlarǵa salyq jáne kóshi-qon jeńildikterin usyný. Túrik kásipkerlerin osy múmkindikti paıdalanýǵa shaqyramyn. Elordamyzda Astana halyqaralyq qarjy ortalyǵy (AIFC) belsendi jumys istep jatqanyn bilesizder. Bul – ınvestorlar men kásipkerlerge jan-jaqty qoldaý kórsetý úshin qurylǵan aımaqtaǵy jetekshi hab. Ortalyq Ystanbul, London, Dýbaı jáne Nıý-Iork qarjy ortalyqtarynyń úzdik tájirıbesin qoldana otyryp, aǵylshyn quqyǵyna sáıkes jumys isteıdi. Munda 90-ǵa jýyq eldiń 5 600-den astam kompanııasy tirkelgen. Sonyń ishinde qarjy, saýda, qurylys jáne basqa da salalarda jumys isteıtin 73 túrik kompanııasy bar. Budan bólek, Astana qarjy ortalyǵy men «Borsa Ystanbul» bırjasynyń arasyndaǵy seriktestik nyǵaıýda. Qazaqstan túrik bıznesimen baılanysty keńeıte berýge múddeli. Bizdiń bilýimizshe, Túrkııada Prezıdent Rejep Taııp Erdoǵannyń bastamasymen ulttyq ekonomıkaǵa aýqymdy ınvestıtsııa tartý úshin naqty sharalar qabyldanatyn boldy. Laıyqty kásipkerlerge birqatar jeńildik pen artyqshylyqtar beriledi eken. Biz bul bastamany mindetti túrde saraptaımyz, qajetti tustaryn paıdalanýǵa tyrysamyz, – dedi Prezıdent.
Memleket basshysy ónerkásip salasyndaǵy yntymaqtastyqty odan ári damytý qajet dep sanaıdy.
– Bul salada naqty jetistikterimiz bar. Osy kezge deıin qazaq-túrik iskerlik toptarynyń birlesken kúsh-jigeriniń arqasynda jalpy quny 7,6 mıllıard dollarǵa teń 142 joba júzege asty. Solardyń qatarynda turǵan YDA Holding kompanııasyn atap ótkim keledi. Bul kompanııa elimizde kópsalaly óndiris keshenin ashty. Sonymen qatar alıýmınıı óndirisin jandandyryp, medıtsınalyq buıymdar shyǵaryp jatyr. Al Panelsan, Betek Boya kásiporyndary qurylys jáne hımııa ónerkásibine qatysty jobalardy júzege asyrýda. Aksa Energy kompanııasy Qyzylorda oblysynda zamanaýı elektr stantsııasyn iske qosty. Bul jobalar Qazaqstannyń óndiristik qýatyn arttyrýǵa septigin tıgizeri anyq, – dedi Qasym-Jomart Toqaev.
Prezıdenttiń pikirinshe, kólik-logıstıka salasyndaǵy baılanysty nyǵaıtý aıryqsha mańyzdy.
– Qazaqstan – Qytaı men Eýropany jalǵap turǵan memleketterdiń biri. Qazir osy baǵyttaǵy júk tasymalynyń 85 paıyzy bizdiń elimiz arqyly ótedi. Transkaspıı halyqaralyq kólik baǵyty, ıaǵnı, Orta dáliz, Qazaqstannyń tasymal salasyndaǵy áleýetin arttyrýǵa oń yqpal etýde. Sońǵy jyldary osy dáliz arqyly ótken júk kólemi 5 eseden astam ósti. Byltyr konteınerlik júk tasymaly 36 paıyzǵa kóbeıdi. Kóp uzamaı bul kórsetkishti 10 mıllıon tonnaǵa jetkizýdi kózdep otyrmyz. Biz tranzıttik tasymal júıesin tıimdi úılestirý úshin «Smart Cargo» biryńǵaı tsıfrlyq basqarý platformasyn ázirledik. Jalpy, Orta dálizdiń múmkindigin arttyrý barshamyzdyń múddemizge saı keledi. Sondyqtan túrik tarapyna «e-permit» jobasyn birge júzege asyrýdy usynamyz. Bul joba júk rásimderin elektrondy túrde, ıaǵnı, meılinshe ashyq júrgizýge múmkindik beredi. Sondaı-aq ákimshilik shyǵyndardy azaıtady. «Orta dáliz» jobasyn «Tramptyń halyqaralyq beıbitshilik jáne órkendeý joly» (TRIPP) bastamasymen ushtastyrý mańyzdy dep sanaımyn. Budan bólek, túrik kásipkerleri elimizdiń áýejaı ınfraqurylymyna qomaqty ınvestıtsııa salǵanyn erekshe atap ótken jón. Qazir TAV Holding kompanııasy Almatydaǵy halyqaralyq termınaldy jańǵyrtýda. Al S Sistem Lojistik kompanııasy Aqtóbe áýejaıynda logıstıka ortalyǵyn salýdy josparlap otyr. Bul jobalar Qazaqstandaǵy áýe tasymalynyń áleýetin arttyrýǵa jol ashady, – dedi Memleket basshysy.
