Prezıdent: Bızneske kedergi keltirý – memleketke qarsy qylmyspen teń

NUR-SULTAN. QazAqparat – Bıznestiń damýyna kedergi keltirý – memleketke qarsy qylmys jasaýmen birdeı. Bul týraly QR Prezıdenti Qasym-Jomart Toqaev Qazaqstan halqyna Joldaýynda málim etti, dep habarlaıdy QazAqparat tilshisi.

«Shaǵyn jáne orta bızneske qatysty reıderlik jıilep ketti. Meniń bul másele boıynsha ustanymym aıqyn. Bıznestiń damýyna, ásirese shaǵyn jáne orta bıznestiń damýyna kedergi keltirýge baǵyttalǵan kez kelgen áreket memleketke qarsy qylmys retinde qaralýy kerek. Osyǵan baılanysty zańnamalyq turǵyda qosymsha sharalar qabyldaý kerek. Parlament pen Úkimet bul máseleni sheshýdiń jolyn usynýy qajet. Sonymen birge, kóleńkeli ekonomıkaǵa qarsy is-áreketti kúsheıtip, kapıtaldy syrtqa shyǵarýǵa jáne salyq tóleýden jaltarýǵa qarsy kúresti qatańdatý kerek», - dedi Prezıdent.