Prezıdent Bıologııalyq qaýipsizdik jónindegi keńes qurýdy tapsyrdy
Bul týraly Tótenshe jaǵdaı rejımin qamtamasyz etý jónindegi memlekettik komıssııanyń qorytyndy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«COVID-19 jáne soǵan uqsas vırýstar bir rettik qubylys emes sııaqty. Sondyqtan bizge praktıkalyq turǵyda ǵana emes, sonymen birge ǵylymı kózqaras turǵysynan da únemi daıyn bolý qajet. Úkimetke bedeldi ǵalymdar men sarapshylardy tarta otyryp, Bıologııalyq qaýipsizdik jónindegi keńes qurǵany jón», - dedi Memleket basshysy.
QR Prezıdentiniń paıymynsha, bilimdi barynsha ıkemdi jasap, balalar men stýdentterdi qashyqtan oqytý rejıminiń hattamalary men ádistemelerin ázirleý, elimizdiń barlyq oqý oryndaryn shynaıy tsıfrlandyrýdy aıaqtaý qajet.
«Zamanaýı qashyqtan oqytý tehnologııalaryn qarqyndy engizý qajet. Bilim berý baǵdarlamalarynyń mazmunyn qaıta qarap shyǵyp, olardy qoljetimdi jáne ınteraktıvti jasaý kerek. Pedagogterdiń ózin daıyndaý jańa talaptar eskerile otyryp júzege asyrylýy tıis», - dedi Qasym-Jomart Toqaev.