Prezıdent bıoalýantúrlilikti saqtaý jónindegi halyqaralyq qor qurýdy usyndy
ASTANA. KAZINFORM — Qasym-Jomart Toqaev COP17 aıasyndaǵy Bıoalýantúrlilik boıynsha kóshbasshylar sammıtinde sóz sóıledi. Memleket basshysy Qazaqstannyń Halyqaralyq sırek túrlerdi qorǵaý jáne bıoalýantúrlilikti saqtaý jónindegi qor qurý týraly bastamasyna toqtaldy, dep habarlaıdy Aqordanyń baspasóz qyzmeti.
Ol sheteldik seriktesterdi atalǵan iske ún qosýǵa shaqyrdy.
— On jylǵa arnalǵan bul bastamany Bıoalýantúrlilikti saqtaý jónindegi ulttyq baǵdarlama tolyqtyra túsedi. Qujat tabıǵı mekendeý ortalaryn qalpyna keltirýdi, túrlerdi qorǵaýdy jáne erekshe qorǵalatyn tabıǵı aýmaqtar jelisin keńeıtýdi kózdeıdi. Budan bólek, Ulttyq genetıkalyq bıoalýantúrlilik bankin qurýǵa kiristik. Qazaqstan aımaqtyq deńgeıdegi tabıǵatty saqtaý sharalaryna belsene qatysady. Bıyl sáýir aıynda Astanada Óńirlik ekologııalyq sammıt ótti. Jıyn qorytyndysy boıynsha Ortalyq Azııadaǵy ekologııalyq yntymaqtastyq jónindegi Astana deklaratsııasy qabyldandy. Teńiz mańyndaǵy bes memlekettiń qoldaýymen Qazaqstan Kaspıı teńiziniń sý resýrstaryn saqtaýǵa baǵyttalǵan halyqaralyq baǵdarlama qabyldaý týraly bastama kóterdi, — dedi Prezıdent.
Sodan soń Qasym-Jomart Toqaev ortaq istiń birneshe baǵytyn aıqyndady. Memleket basshysy sý resýrstaryn basqarýda berik baılanys qajet dep sanaıdy.
— Ótken jyly Qazaqstan BUU júıesinde Halyqaralyq sý uıymyn qurýdy usyndy. Bul bastama Ortalyq Azııa elderine ortaq ári oǵan múddeles memleketterdiń barlyǵy ún qosa alady. Maqsatymyz — sý qaýipsizdigin nyǵaıtyp, ózen-kólder men sýly-batpaqty alqaptardyń jaı-kúıine táýeldi tabıǵı ekojúıelerdi qorǵaý, — dedi ol.
Budan buryn Prezıdent «Taza Qazaqstan» aktsııasy jalpyulttyq ıdeologııaǵa aınalyp kele jatqanyn aıtty.
