Prezıdent bıoalýantúrlilikti saqtaý sharalarynyń nátıjesin atady
ASTANA. KAZINFORM – Qazaqstan barlyq seriktesin Sırek kezdesetin jan-janýarlar túrleri men bıoalýantúrlilikti saqtaý halyqaralyq qoryna múshe bolýǵa shaqyrady. Bul týraly Óńirlik ekologııalyq sammıtte Memleket basshysy Qasym-Jomart Toqaev aıtty.
- Bıoalýantúrlilikti saqtaý – ekologııalyq saıasatymyzdyń negizgi baǵyttarynyń biri. Tabandy eńbek nátıje berdi. Joıylý qaýpi tóngen aqbókender qaıta kóbeıdi. Qazaqstandaǵy qar barysynyń sany eki ese ulǵaıyp, 190-ǵa jetti. Halyqaralyq seriktestermen birlesip, basqa da sırek kezdesetin jan-janýarlardyń, atap aıtqanda, suńqarlardyń, Turan jolbarysynyń jáne Prjevalskıı jylqysynyń popýlıatsııasyn qalpyna keltirýge kiristik, - dedi Prezıdent.
Memleket basshysy orman alqaptaryn ulǵaıtý Qazaqstannyń ekologııalyq kún tártibindegi basym mindetteriniń birine aınalǵanyn basa aıtty.
- Sońǵy bes jylda bir mıllıon gektardan asa aýmaqqa 1,5 mıllıardtan astam aǵash ektik. Sonyń ishinde shóleıttený úderisin báseńdetý maqsatynda ózbek mamandarymen birge Aral teńiziniń tabanyna sekseýil otyrǵyza bastadyq. Qazaqstan barlyq seriktesin Sırek kezdesetin jan-janýarlar túrleri men bıoalýantúrlilikti saqtaý halyqaralyq qoryna múshe bolýǵa shaqyrady. Memleketaralyq yntymaqtastyq alańynda ǵylymı zertteýler júrgizilip, ekojúıelerdi qorǵaýdyń tıimdi sheshimderi ázirlenedi, - dedi Qasym-Jomart Toqaev.
Aıta keteıik, birneshe eldiń Prezıdenti qatysyp jatqan Óńirlik ekologııalyq sammıt «Ornyqty bolashaqqa ortaq kózqaras» taqyrybymen ótip jatyr.
