Prezıdent: Bıyl on aıda tasymal kólemi bir jarym mıllıon tonnany qurap, 14 paıyz ulǵaıdy

ASTANA. KAZINFORM – Prezıdent kelissózder barysynda ekijaqty kún tártibiniń keń kólemdi máseleleri talqylanyp, yqpaldastyqtyń basym baǵyttary belgilengenin jetkizdi. Áýelgi kezekte saýda-ekonomıkalyq baılanystardy keńeıtýge nazar aýdaryldy.

– Birlesken kúsh-jigerimizdiń arqasynda elderimiz arasyndaǵy taýar aınalymy jyl saıyn jarty mıllıard dollardan asady. Bıylǵy kórsetkishterge de kóńil tolady. Qurmetti Túrikmenstan Prezıdentimen birge ózara saýda kólemin bir mıllıard dollarǵa deıin ulǵaıtý úshin qajetti sharalardy qolǵa alamyz. Osy maqsatta Qazaqstan taýar aınalymyn ulǵaıtý jónindegi jumys josparyn qabyldaýdy usyndy. Eki eldiń bıznes ókilderin qoldaý úshin Saýda úılerin ashý týraly sheshim qabyldadyq. Sondaı-aq qos memlekettiń qalalary arasynda tikeleı kommertsııalyq áýe reısterin ashý máselesin qarastyrýǵa kelistik, – dedi Prezıdent.

Qazirgi ýaqytta kólik-tranzıt salasy strategııalyq basymdyqqa ıe. Bul oraıda Soltústik – Ońtústik kólik dáliziniń mańyzdy býyny retinde Qazaqstan – Túrikmenstan – Iran temirjol baǵdary erekshe ról atqarady.

– Bıyl on aıda tasymal kólemi bir jarym mıllıon tonnany qurap, 14 paıyz ulǵaıdy. Tarıfterdi ońtaılandyrý, ákimshilik úderisterdi jeńildetý sharalary qabyldanýda. Shekara mańynyń ınfraqurylymy belsendi túrde damyp, ótkizý beketteri jańǵyrtylyp jatyr. Túrikmenbashy – Garabogaz – Qazaqstan shekarasy baǵyty boıynsha jol ınfraqurylymdaryn ushtastyrý máselesi birtindep sheshilýde. Konteınerlik tasymaldy jandandyrý úshin Kaspııdegi Aqtaý, Quryq, Túrikmenbashy porttarynyń kólik-logıstıkalyq áleýetin tolyq paıdalanýǵa ýaǵdalastyq, – dedi Qasym-Jomart Toqaev.

Budan bólek, kelissózder barysynda Aýǵanstan arqyly ótetin Ońtústik Azııa baǵytyndaǵy temirjol jelisin tartý perspektıvasy qarastyrylǵan.

Aıta keteıik, Qasym-Jomart Toqaev pen Serdar Berdimuhamedov BAQ ókilderine arnalǵan brıfıng ótkizdi.