Prezıdent Bıbisara Asaýbaevany halyqaralyq áıelder merekesimen quttyqtady
«Kim quttyqtap úlgergen?» dep surady shahmatshydan oqyrmandarynyń biri.
«Prezıdent», - dep jaýap qatqan Bıbisara Asaýbaeva jelige jedelhat pen gúl shoǵynyń sýretin saldy.
«Qurmetti Bıbisara Erhanqyzy! Shuǵylaly kóktem merekesimen birge jan dúnıeńiz jadyrap, kóńilińiz kórkeıe bersin. Aınalańyzǵa qýanysh pen shattyq syılap, árdaıym ystyq yqylasqa bólenińiz. Shýaqty kúnderińiz kóp bolsyn. Sizge zor densaýlyq jáne baq-bereke tileımin» delingen Qasym-Jomart Toqaev joldaǵan quttyqtaý lebizinde.
19 jastaǵy Bıbisara Asaýbaeva - blıts shahmattan eki dúrkin álem chempıony. Eki jyl buryn 17 jasynda eń jas álem chempıony atanǵan ol Gınnestiń rekordtar kitabyna endi.
Ekinshi márte chempıon ataǵyn ótken jyldyń jeltoqsan aıynda Almatyda ótken álem chempıonatynda jeńip aldy.
Odan bólek, jýyrda ǵana jerlesimiz Máskeýde ótken «Shahmat juldyzdary» atty halyqaralyq týrnırde blıtsten áıgili grossmeıster Sergeı Karıakındi jeńdi.