Prezıdent BI Group holdınginiń enshiles kásipornyn aralady
Temirbeton konstrýktsııalaryn shyǵaratyn MODEX Astana zaýyty 2020 jyldan beri jumys istep tur jáne onda 360 adam eńbek etedi. Jobanyń quny – 16 mlrd teńge, dep habarlaıdy Kazinform.
Kásiporynda ındýstrııalyq-modýldik qurylystyń ınnovatsııalyq tehnologııalary qoldanylady.
BI Group kompanııasy dırektorlar keńesiniń tóraǵasy Aıdyn Rahymbaevtyń aıtýynsha, modýldik úıdiń qurylysy ártúrli ǵımarat salý ýaqytyn edáýir qysqartýǵa, olardyń ózindik qunyn tómendetýge múmkindik beredi.
Bul halyqtyń basym bóligi úshin turǵyn úıdiń qoljetimdi bolýyna yqpal etedi.
Atalǵan tehnologııany úılerdiń, kottedjder men turǵyn úı keshenderiniń qurylysy kezinde ǵana emes, sondaı-aq áleýmettik ınfraqurylym nysandaryn salý barysynda da qoldanýǵa bolady.
Kompanııa qurylǵan kúnnen bastap osy tehnologııa boıynsha jalpy aýdany 200 myń sharshy metrden astam nysandar saldy.
