Prezıdent: Beıbitshilik pen turaqtylyq – taǵdyrdyń bizge bere salǵan syıy emes
ASTANA. KAZINFORM – Beıbitshilik pen turaqtylyq – taǵdyrdyń bizge bere salǵan syıy emes. Bul týraly Qazaqstan halqy Assambleıasynyń XXHІV sessııasynda Memleket basshysy Qasym-Jomart Toqaev aıtty.
- Qazaq qashanda kórshisin qadirleı bilgen. Qýanyshta da, qıyndyqta da kórshisine súıengen, kórshiniń qasynan tabylǵan. «Kórshi aqysy – táńir haqysy» degen uǵym dinimizde jáne dástúrimizde bar. Bul – bizge atadan qalǵan ósıet, anadan berilgen qasıet. Halqymyzdyń tatý kórshilik dástúri áli de jalǵasyp keledi. Qonystas adamdar ultyna, dinine, tiline qaramastan aralasyp, quralasyp jatady, - dedi Memleket basshysy.
Prezıdent Qazaqstan kórshi memlekettermen dostyqty nyǵaıta túsýge aıryqsha mán beretindigin basa aıtty.
- Reseı – Qazaqstannyń burynnan kele jatqan negizgi strategııalyq seriktesi ári senimdi odaqtasy. Qytaı elimen yqpaldastyq tamyry da tereńde jatyr. Qytaı halqy qazaq halqyna eshqashan zııan keltirgen joq, bolashaqta da zııan keltirmeıdi. Alataýdy teń jaılaǵan qyrǵyzdar – bir týǵan baýyrlarymyz. Ejelden enshiles ózbek aǵaıyndy óz aǵam dep qadir tutamyz. Túbimiz bir dep túrikmenderdi týys sanap, shyn júrekten qurmetteımiz. Qart Kaspııdiń jaǵasyndaǵy ázerbaıjan eline degen yqylasymyz da erekshe. Bir sózben aıtsaq, kórshi eldermen qarym-qatynasymyz baýyrlastyq rýhynda damyp keledi. Bizdiń aramyzda túıtkildi másele joq. Qazaqstan men Reseı qurlyqtaǵy eń uzyn shekarany áýel bastan daý-damaısyz shegendep aldy. Jaqynda Qyrǵyzstan, Ózbekstan jáne Tájikstan uzaq jyl boıy sheshimin tappaǵan shekara máselesi boıynsha ortaq mámilege kelip, tarıhı kelisimge qol qoıdy dep aıtýǵa bolady. Biz baýyrlas elder úshin qýanamyz, olardy árdaıym qoldaımyz, - dedi Prezıdent.
Memleket basshysynyń paıymynsha, qazirgideı aýmaly-tókpeli zamanda aýyzbirshiliktiń qadiri arta túskeni sózsiz.
- Beıbitshilik pen turaqtylyq – taǵdyrdyń bizge bere salǵan syıy emes. Bul – bir el, bir halyq bolyp atqaryp jatqan qajyrly eńbektiń jemisi. Biz syndarly sátte jurt bolyp jumyla bilemiz. Buǵan byltyr Aqtaý mańynda ushaq apaty bolǵanda taǵy bir márte kózimiz jetti. Azamattarymyz zardap shekken adamdardan kómegin aıaǵan joq. Kezekke turyp, qan tapsyrdy. Ázerbaıjan Elshiligine baryp, gúl shoqtaryn qoıdy. Búkil álem halqymyzdyń uıymshyldyǵy men janashyrlyǵyna tánti boldy. Halqymyzdyń júregi – keń, peıili – aq, nıeti – taza. Meıirimdilik, qamqorlyq jáne tileýlestik – bizdiń ulttyq ereksheligimiz. Biz osy qundylyqtarymyzdy saqtap, óskeleń urpaqtyń boıyna sińirýimiz kerek, - dedi Qasym-Jomart Toqaev.
Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.