Prezıdent: Beıbit zamanda jaqyndarymyzdy joǵaltpaýymyz kerek
NUR-SULTAN. QazAqparat – Prezıdent Qasym-Jomart Toqaev koronavırýstyń jańa tolqyny burynǵylarynan da joıqyn bolyp turǵanyn atady, dep habarlaıdy QazAqparat tilshisi Aqordanyń Twitter-degi paraqshasyna silteme jasap.
«Koronavırýstyń jańa tolqyny joıqyn bolyp otyr. Sońǵy kúnderi júzdegen azamatymyzdan aıyrylyp qaldyq. Ár óńirde aýrýhanaǵa túsken naýqastardyń sany kúrt kóbeıdi. Jansaqtaý bólimderiniń barlyǵy iske qosyldy. Qosymsha dári-dármek pen qural-jabdyq satyp alyndy», - dedi Memleket basshysy eldegi sanıtarlyq-epıdemıologııalyq ahýal jónindegi jumys keńesinde.
Prezıdent vırýs qazaqstandyqtardyń eń názik tustaryna soqqy bolyp tıip jatqanyn atady.
«Bul kúreste bizdiń aǵa býyn zardap shegýde, budan da jamany – balalar indetke shaldyǵýda. Ózińizdi jáne jaqyndaryńyzdy osy qaýipten qorǵaýdyń jalǵyz joly – vaktsınatsııa. Álemdik medıtsına ázirge budan basqa ádisterdi usynǵan joq jáne jaqyn bolashaqta usynýy ekitalaı», - dedi Qasym-Jomart Toqaev.
Prezıdenttiń aıtýynsha, vaktsına – bul ózimizdi jáne otbasymyzdy qorǵaýdyń jalǵyz múmkindigi.
«Bizdiń balalar bizdiń qatelikterimiz úshin aqy tólemeýi kerek! Beıbit ýaqytta jaqyndarymyzdy joǵaltpaýymyz kerek. Elimizdiń ár azamatyna aıtarym: densaýlyqty saqtańyzdar, týǵan-týystyń, otbasynyń amandyǵyn oılańyzdar! Al, Úkimet pen óńir basshylary belgilengen mindetterdiń bárin minsiz atqarýǵa tıis», - dep túıindedi Memleket basshysy.
