Prezıdent: Beıbit turǵyndardy lańkesterden bólip alýymyz kerek

NUR-SULTAN. QazAqparat – QR Prezıdenti Qasym-Jomart Toqaev «Qazaqstan» telearnasyna bergen suhbatynda qańtar tragedııasy kezinde beıbit mıtıngini tártipsizdikke ulastyrǵandardyń qaıdan paıda bolǵanyn aıtty, dep habarlaıdy QazAqparat tilshisi.

«Men osy suraqqa birneshe ret jaýap berdim. Munyń aldyn ala josparlanǵan áreket ekeni anyqtaldy. Arnaıy daıyndyqtan ótken qylmystyq toptar, lańkester oqıǵanyń bel ortasynda júrip, qaraqshylardy, quqyq buzýshylardy basqardy. Árıne, buzaqy toptardyń arasynda beıbit azamattar da boldy», - dedi Memleket basshysy.

Onyń aıtýynsha, arandaýǵa ergen beıbit sherýshilerdi lańkesterden, qaraqshylardan bólip alýymyz kerek.

«Bul – óte kúrdeli másele. Munyń bárin tergeý jumystary anyqtaıdy. Jalpy, myna nárseni durys túsinýimiz kerek. Alańda shyqqandardyń bárin túgel beıbit sherýshi dep aıtýǵa bolmaıdy. Bul eshqandaı aqylǵa syımaıtyn nárse. Kózi ashyq, ary taza adam mundaı jalǵan tujyrymǵa eshqashan senbeıdi.

Eń aldymen, lańkester jaǵdaıdy ýshyqtyrdy. Olardyń maqsaty – eldiń tutastyǵyn buzý, halyqty qorqytý. Al, beıbit sherýshiler solardyń qarmaǵyna tústi. Qazir sol kinásiz azamattardyń quqyǵyn qorǵaýymyz kerek. Men árbir is boıynsha muqııat tergeý júrgizý kerek dep aıttym. Adamdardyń quqyǵyn buzǵan tulǵalar jazaǵa tartylady. Biz buǵan qajetti sharanyń bárin qabyldaımyz. Esh kúmán bolmasyn», - dedi Prezıdent.